Pingajussaanik akiuussuserneqarnissamik nualluummullu akiuussuserneqarnissamik neqeroorut

Kalaallit Nunaanni maanna innuttaasut aalajangersimasut COVID-19-mik ulorianartorsiorsinnaanerusutut nalilikkat  pingajussaanik akiuussusertinnissamik neqeroorfigineqalerput.

Pingasoriarluni akiuussutissamik kapiteqqinneq COVID-19-mut pitsaanerusumik sivisunerusumillu illersuutaasarpoq.

Peqatigitillugu innuttaaasut aalajangersimasut, ulorianartorsiorsinnaanerusutut nalilikkat  akornanni nualluummut akiuussuserneqarnissamik neqeroorfigineqassapput. Nualluut virusimik tunillatsinneruvoq, kikkulluunniit atugarisinnaasaat, ukiukkullu akulikinnerusumik atugaasartoq. Innuttaasut ilaasa sakkortunerusumik atortarpaat, allaallu inuunermik ulorianartorsiortitsisinnaasarluni, aammalu perulunnerulertoqarsinnaasarpoq, ataatsikkut COVID-19 nuallunnerlu atoraanni.

Pingajussaanik akiuussusertinnissaq nualluummullu akiuussusertinnissamik neqeroorut akeqanngilaq, akiuussusertikkumagaannilu nammineq aalajangerneqassaaq.

Pingajussaanik akiuussusertinneq nualluummullu akiuussusertinneq ataatsikkut neqeroorutigineqassapput. COVID-19-mut pingajussaaneerlutit akiuussertikkiartoruit, piffisami tassani nualluummut akiuussertissinnaavutit.

Akiuussusersuinissamut pilersaarut uani takuuk.

Qaammatit arfinillit sap. ak. marlullu matuma siorna aappassaanik akiuussuserneqarsimaguit, boostervaccinemik (pingajussaanik) kapitissinnaavutit. Sumiiffiit ilaanni peqqissaavinniit aggersarneqarumaarputit, sumiiffiillu ilaanni drop-in (ornigutiinnarluni) kapitikkiartortoqarsinnaajumaarluni. Illit qaqugukku akiuussuserneqarsinnaanerlutit akiuussusersuinissamut pilarsaarut uani takuuk.

Aappassaanik kapitinnermi akiuussut atorneqartoq atorlugu pingajussaanik akiuussuserneqarumaarputit.

Inuit, Danmarkimisut pingajussaaneerluni akiuussusertinnissamik neqeroorfigineqarsimasut, aammalu nalilersuutinik qulaani taaneqartunik naammassinnissimasut, Kalaallit Nunaanni pingajussaaneerluni akiuussusertinnissamik neqeroorfigineqassapput, naak pingaarnertut akiuussusertereersimanngikkaluartut. Pingaarnertut akiuussusertinnerup kingorna qaammatit arfinillit sap. ak.-tillu marluk qaangiussimanissaannik nalilersuutigineqartoq aamma naammassineqarsimassaaq.

EU-Kommissionip akuersissutigereerpaa, pingajussaanik akiuussusertinneq tassaassasut Comirnaty® Pfizer/BioNTech imaluunniit Spikevax® Moderna inuit 18-nik taakkulu qaangerlugit ukiullit.

Pingajussaaneerluni akiuussusertinneq pissaaq, siusinnerpaamik aappassaaneerluni pingaarnertut akiuussusertinnerup kingorna qaammatit 6 sap. akunnerilu marluk qaangiuppata. Kapitinnermi siullermi aappassaanilu akiuussutissaq atorneqartoq assigalu pingajussaanik kapitinnissamut neqeroorfigineqassaatit.

Corminaty® Pfizer/BioNtech-meersumik pingajussaaneerluni akiuussuserneqarnermi annertussusissaa siullermik akiuussuseqarneq assigalu 30 mikrogramimik annertussusilimmik akiuussusiisoqassaaq.

Spikevax® Moderna-meersumik pingajussaaneerluni akiuussuserneqarnermi annertussusissaa siullermik akiuussuseqarneq assigalu 50 mikrogramimik annertussusilimmik akiuussusiisoqassaaq.

Pisuni immikkorluinnaq ittuni aammalu nakorsamit nalilerneqarneq naapertorlugu pingajussaaneerluni ”allamik meqqilimmik” akiuussusertittoqarsinnaavoq.

Taamatulli aamma COVID-19-imut pingaarnertut akiuussusersuinermi mianersornissamut malittarisassat aamma akiuussuserneqarsinnaanngitsunut tunngasut atuupput. Mianersornissamut malittarisassat aammalu akiuussuserneqarsinnaanngitsunut tunngasut atuakkit, uani.

Pingajussaanik akiuussuserneqarnissaq pillugu paasisaqarnerorusukkuit uani quppersakkami paasisaqarnerusinnaavutit.

Akiuussutissat tamarmik saniatigut sunniuteqarsinnaapput, tamanna aamma COVID-19-imut akiuussutissanut atuuppoq. Amerlanertigut sakkukitsumik sivikitsumillu nalinginnaasumik uloriananngitsumillu atuuttarput. Peqqissutsimut oqartussaasut akiuussutissat EU-mit akuerisat assut isumannaatsutut uppernarsarluarneqarsimasutullu isigaat.

Akiuussutissamut sakkortusaataasumik akiuussutissinneqarnermi naatsorsuutigineqarsinnaavoq COVID-19-imut akiuussutissap saniatigut sunniuteqartarneratulli kinguneqarsinnaanera.

Saniatigut sunniutit uani atuakkit.

Nualluummut akiuussutissamik akeqanngitsumik ukua neqeroorfigineqassapput:

  • Innuttaasut tamarmik januarip 15-iani 2022 nallertinnagu 65-ileereersimasut
  • Siunisaarlutik soraarnerit
  • Innuttaasut 65-iliineqanngitsut immikkut aarlerinartorsiortut:
    • Type 1-imik imaluunniit 2-mik sukkortut
    • Uummatikkut ataavartumik nappaatillit
    • Puamikkut ataavartumik nappaatillit
    • Tingumikkut aamma tartumikkut ataavartumik nappallit
    • Inunnguuseralugu imaluunniit tunillanneqarnikkut akiuussutissaqarnikkut ajoquteqartut
    • Nukitigut sanngiilisimanerup kinguneranik anersaartornikkut sunnerneqarsimasut
    • Ilungersunartumik pualasuut (BMI>40)
    • Qaammatit afinilissaanni imaluunniit qulingiluassaanni naartusut
    • Sakkortuumik akiuussuserneqarsimasunut inoqutigiinnut attaveqartut
  • Peqqinnissaqarfimmi utoqqarnillu sullissisut, innuttaasut immikkut aarlerinartorsiortut ulluinnarni sullissisartut, paaqqutarinnittartut peqqissaasartullu.

Nakorsamit innuttaasoq akiuussutissamik neqeroorfigineqassanersoq sukumiisumik nalilerneqartarpoq.

Kalaallit Nunaanni nualluummut akiuussutissaq Fluenz Tetra® atorneqartarpoq,  uumassusillit nukillaartitat atorlugit akiuussutissaasoq.

Meeqqanut nualluummut akiuussutissaq qinngami sorlunnut seqqartaatitut tunniunneqartarpoq.

Akiuussutissaq nappaatillit ilaannut meeqqanullu timimikkut akiuussutissaluttunut atoqquneqanngilaq. Meeqqanut timimikkut akiuussutissaluttunut qatanngutaasut akiuussutissamik uumassusillit nukillaartitat atorlugit akiuussutissalerneqartariaqanngillat, meeqqap timimigut akiuussutissaluttup tunillanneqarsinnaanera pissutigalugu.

Meeqqat 2 – 6-inut ukiullit marloriarluni, sapaatip akunnerinik 4-nik akunnilertarlugit, akiuussutissamik neqeroorfigineqassapput.

Meeraq nualluummut akiuussuserneqareersimappat ataasiaannarluni akiuussusiisoqassaaq.

Meeqqanut nualluummut akiuussutissaq qinngami sorlunnut seqqartaatitut tunniunneqartarpoq.

Nualluummut akiuussutissaq meeqqanut marlunniit arfinilinnut ukiulinnut atugaq pillugu uani atuarnerugit

Nalinginnnaasupilussuupput (> 10 %)

Naanik-inalukkanik ippigisaqarneq

Qasoqqaneq, iluaalliorneq

Kapitiffigisap nalaatigut ippigisaqarneq iluaalliorneq

Nererusussuseqarpallaarunnaaneq

Nukikkut anniarneq

Niaqorlunneq

Puullinganeq, Isumaloqqajaaneq

Nalinginnaanerit (1-10 %)

Timminneq, meriarneq

Kissarneqarneq, qiiarlunneq

Saarngerineq

Kiagunnermik iluaalliorneq