Meeqqanut 12-init ukiullit akiuussutissamik kapisineq

Meeqqat 12-init ukiullit maannakkut COVID-19-imut akiuussutissamik neqeroorfigineqarput. Neqeroorut nammineq piumassuseq malillugu pineqarsinnaavoq akeqaranilu.

Kalaallit Nunaanni COVID-19-imut akiuussutissaq atorneqartoq Moderna sunniuteqarluartutut akuerisaavoq aamma meeqqanut 12-init ukiulinnut isumannaatsuulluni.

Aamma Danmarkimi, Europamilu nunani allani amerlanerni USA-mi Israelimilu akiuussutissaq meeqqanut 12-init ukiulinniit neqeroorutigineqarpoq.

Kalaallit Nunaanni peqqissutsikkut oqartussat meeqqat 12-init ukiullit COVID-19-imut akiuussuserneqarnissaat innersuussutigaat. Innersuussutiginninnermut patsisit assigiinngitsuupput:

COVID-19 allannguuteqarluni suli annertusiartorpoq. Innuttaasut amerlanerpaat, aamma 12-15-inik ukiullit akiuussuserneqarneratigut inuiaqatigiinni tunillanneqarsinnaannginneq annertunerusoq anguneqassaaq, taamaasilluni tunillaassuunneq aqunneqarsinnaanerulluni.

Meeqqat COVID-19-imik napparsimanissamut akiuussutissamik illersorpai. Meeqqat COVID-19-imik sakkortuumik eqqugaasarnerat qaqutigoorpoq.

Meeqqat akiuussuserneqarsimasut tunillaassuinermik unitsitsisinnaapput, namminneerlutik tunillanneqarnissaannut, aammalu allanut tunillaanissaannut aarlerinaat annikinnerugami. Taamaasillutik allanik, soorlu utoqqarnik, ilaqutariinni sanngiitsunik, akiuussuserneqarsimanngitsunillu illersuissapput.

Inuiaqatigiinni tunillanneqarsinnaannginneq annertunerusoq meeqqanut inersimasunullu ulluinnarmik nalinginnaasumik misissortiffiunngitsumik tuniluunnermillu paasiniaaffiunngitsumik tunniussissaaq.

COVID-19-imut akiuussutissaq Moderna Kalaallit Nunaanni atorneqartoq meeqqanut 12-inik ukioqalereersunut tamanut akuerisaavoq. Europami nakorsaatinik nakkutilliisunit (EMA) meeqqanut tamanut 12-inik ukioqalereersimasunut akiuussutissaq akuerineqarpoq akuersinissamut misissuisoqareernerata kingorna, tamatuma takutippaa COVID-19-imut akiuussutissaq tuniluutsitsinaveersaarsinnaasoq meeqqanullu 12-inik ukioqalereersunut isumannaatsuusoq.

Danmarkimi Peqqinnissamut Aqutsisoqarfimmit suliatigut sukumiisumik misissuineq ingerlanneqareerpoq, tamannalu tunngavigalugu meeqqanut 12-inik ukioqalereersunut akiuussutissaq innersuussutigineqarpoq. Akiuussutissap Modernap isumannaatsuunera sunniuteqarluartarneralu siunissami Lægemiddelstyrelsenimit, EMA-mit Kalaallit Nunaannilu peqqinnissakkut oqartussanit malinnaaffigilluarneqassaaq.

Akiuussutissat tamarmik kingunerluuteqartitsisarput aamma COVID-19-imut akiuussutissat taamaapput. Amerlanertigut kingunerluutit sakkukinnerit pineqartarput, nalinginnaasuupput timillu akiuussutissaasa akiuussutissamut qisuariarneranut takussutissaalluni.

Kingunerluutit nalinginnaasut tassaasinnaapput kapitiffiup nalaata aappillilaarnera, ippigusunneq pullannerlu, kissarneqalaarneq, qasoqqaneq, niaqorlunneq, nukikkut naggussakkullu anniarneq. Kingunerluutit nalinginnaasumik ullualunni sivisussuseqartarput.

Qaqutigoortumik sakkortuumik kingunerlutsitsisoqarsinnaavoq, assersuutigalugu sapigaqarluni qisuariarnerit. Akiuussutissami akuutissat ilaannik sapigaqarneq tamatumunnga ilaatigut pissutaasinnaavoq. Meeqqat ilisimaneqartumik annertuumik sapigaqarpat soorlu nakorsaatinik, peqqissaavimmi sulisoq meeqqannik  kapisisussaq oqaloqatigisariaqassavat, imaluunniit kapitinnginnerani peqqissaavik attaveqarfigalugu.

Meeqqat 12-nik 14-inillu ilanngullugit ukiullit COVID-19-imut akiuussutissalerneqartussat angajoqqaatut oqartussaasumit kapitinnissamut ilisimatinneqareerluni akuersisussamit ingiaqateqassapput. Nammineq piumassutsimik isumaqataalluni akuersineruvoq, atuutissagunilu allagaqaataaqqaartariaqarani.

Meeqqap kapitinnginnerani angajoqqaatut oqartussaasoq akiuussutissamut apeqqutissaqaruni akineqarnissamik neqeroorfigineqassaaq. Assersuutigalugu kingunerluutinut apeqquteqaataasinnaapput. Angajoqqaatut oqartussaasup akiuussutissamik kapisisussamik oqaloqateqarnerani, kapitinnginnerani aamma/imaluunniit peqqinnissaqarfimmi oqartussanit quppersagaliaq paasissutissanik attuumassuteqartunik imalik atuarlugu apeqqutissat akineqarsinnaassapput.

Angajoqqaatut oqartussaasup meeqqap kapitinnissaa pillugu paasissutissanik paasitinneqarnissani itigartitsissutigisimappagu, tamatuminngali neqeroorfigineqarsimappat, ilisimatinneqareerluni akuersissummut piumasaqaatit atuutiinnassapput.

Angajoqqaatut oqartussaasoq pinaaserpat kapisisussaq aperisariaqalissaaq meeqqap akiuussutissamik kapitinnissaa akuerisimaneraa.

Meeraq angajoqqaatut oqartussaasoq ilaginagu takkuppat, meeraq akiuussutissamik kapineqassanngilaq. Assersuutigalugu aanaasoq aataasorlu meeqqamut angajoqqaatut oqartussaassuseqanngitsoq akuersisinnaanngilaq.

Meeqqallu akiuussutissamik kapitikkusunnginninni ersarissumik takutippagu pimoorunneqartutut isigineqassaaq.

Angajoqqaatut oqartussaassusilimmit akuersissut immersugassaq uani aaneqarsinnaavoq: Meeqqanik aqqaneq marluk 14-inillu ilanngullugit ukiulinnik Covid-19-imut (SARS-2) akiuussutissiineq

Kingullermik nutarterneqarpoq