COVID-19-imut akiuussutissinneqareernermi kingunerluutit

Kingunerluutit akiuussutissanit tamanit sunniutaapput nalinginnaasut Ataatsimut isigalugit kingunerluutit tassaapput timivit akiuussutissaasa akiuussutissamik kapitinnermut qiusariarnerat.

Nakorsaatit allat tamaasa assigalugit COVID-19-imut akiuussutissat kingunerluuteqarsinnaapput. Kingunerluutit ataatsimut isigalugit sakkukinnerupput, qaangiutiasut, nalinginnaasut amerlanerpaartaatigullu ulorianaateqanngitsut.

Peqqissutsimut oqartussaasut akiuussutissat EU-mit akuerisat assut isumannaatsutut uppernarsarluarneqarsimasutullu isigaat. Akiuussutissaq akuerineqartinnagu, inuit titusindilippassuit annertuumik misileraaffigineqaqqaartarput. COVID-19-imut akiuussutissaq akuerineqassappat, nappaammut illersuisinnaanissaa, kiisalu akiuussutissamik pinermit kingunerluutit, ersiutinit imaluunniit nappaammit akiuussutissap illersuiffigisassaanit ajornerussannginnerat pingaarnerpaasarpoq.

Ineriartortitsinermi killiffiit assigiinngitsut ataatsikkut ingerlanneqarsimammata COVID-19-imut akiuussutissanik ataatsimut misilittakkat piffissami nalinginnaasumit sivikinnerusumik katersorneqarsimapput. Naak akiuussutissat nalinginnaasumit sukkanerusumik ineriartortinneqaraluartut, uppernarsaasiorneq allatulli sukumiisumik ingerlanneqarsimavoq. COVID-19-imut akiuussutissanik misilittaanerit nunarsuup oqaluttuarisaanerani annertunerpaasimapput.

Imaassinnaavoq naatsorsuutiginngisanik kingunerlutsitsisoqarsinnaasoq, akiuussutissamilli kapitereernermi kingunerlutsitsinerit sapaatit akunnerini siullerni arfinilinni takkuttartut, kingornalu takkuttarnerat qaqutigoortorujussuusoq akiuussutissanit allanit misilittakkat ersersippaat.

Nakorsaatinut oqartussat akiuussutissat sukumiisumik nakkutigaat, aamma akuerineqareeraluarpata. Taamaalinikkut akiuussuserneqarnissaq annerusumik aarlerinaateqassappat sukkasuumik qisuariartoqarsinnaavoq. Assersuutigalugu misilittaanermi ersinngitsunik kingunerluuteqartoqarsinnaavoq, imaluunniit misilittaanermi takusanit akulikinnerusumik takussaasunik kingunerlutsitsisoqarsinnaalluni.

Peqqinnissaqarfinni sulisut innuttaasullu kingunerlutsitsinermik nalunaarutiginninneri ilaatigut atorlugit nakkutilliineq pisarpoq.

Kingunerluutit nalinginnaasut:

• Qasoqqaneq

• Niaqorlunneq

• Nukikkut naggussakkullu anniarneq

• Uulikullattarneq

• Kissarneqalaarneq

• Kapitiffiup nalaani ippigusunneq, aappillerneq pullannerlu

Kingunerluutinik sakkukitsunik akulikinnerusutut oqaatigineqarsinnaasunik kingunerlutsitsiguit najukkanni peqqinnissaqarfik attavigisariaqanngilat Assersuutigalugu kissarneqalaaruit, tassa timivit akiuussutissaasa qisuariarnerattut paasineqassaaq.

Qaqutigut navianaatilinnik kingunerluuteqartoqarsinnaavortaaq. Akiuussutissami akuutissat ilaannik sapigaqarneq tamatumunnga ilaatigut pissutaasinnaavoq. Assersuutigalugu nakorsaatinik sakkortuumik sapigaqarlutit nalunngikkukku inummut akiuussutissamik kapisisussamut, akiuussusertinnginninni, ilisimatitsissutigissavat.

Akiuussutissinneqareernerpit kingorna perulunnartunik ersiuteqaruit, najukkanni peqqissaavimmut attaveqartariaqarputit. Taakku tassaasinnaapput sapigaqarnikkut anernikilliorneq ammikkulluunniit aniornininneq. Ersiutaasut akiuussutissameersuunersut allamilluunniit patsiseqarsinnaanersut nakorsap naliliivigisinnaavaa.

Akiuussutissinneqarnerup kingunerluutitaanik ersiuteqarnerit nalornigukku napparsimmavik /peqqissaavik qaninneq attavigisinnaavat.

Nunatsinni Nakorsaaneqarfik Nunatsinni COVID-19-imut akiuussutissanit kingunerluutaasorisanik nakkutilliinermi peqataavoq.

Kingunerluutinik nalunaaruteqarnissaq najukkanni napparsimmaviup/peqqissaaviup pisussaaffigaa.

COVID-19-imut akiuussutissinneqarnermut atatillugu kingunerluutit illit nammineq nalunaarutigisinnaavatit.

COVID-19-imut akiuussutissinneqareernerup kingorna kingunerluutit nalunaarutigikkit Indberet bivirkninger efter vaccination mod COVID-19 (sullissivik.gl-imut ingerlaqqissaatit) link aaqqitassaavoq