Meeqqanik 5-11-nik ukiulinnik akiuussusersuineq

Meeqqanut 5-11-nik ukiulinnut COVID-19-imut akiuussusertinnissaq neqeroorutaalerpoq. Neqeroorut nammineq toqqagaavoq akeqarnanilu.

Meeqqat 5-11-nik ukiullit COVID-19-imut akiuussuserneqarnissaat peqqinnissaqarfimmi oqartussat innersuussutigaat:

  • Meeqqat minnerit akornanni tuniluunneq annertusiartormat, 5-11-nik ukiulinnik akiuussusersuinikkut tuniluunneq aqunnerulersinnaavarput.
  • Meeqqat akiuussuserneqarnikut tuniluunneq annikinnerulersittarpaat Meeqqat COVID-19-imik perululertartut akuttugaluartut akiuussusersuinikkut allanut illersuisinnaapput inuiaqatigiillu akornanni tuniluunneq annikillisillugu, napparsimaviit artorsalinnginnissaat pillugu.
  • Meeqqat inersimasullu nalinginnaasumik ulluinnaqalernissamut inuiaqatigiinni tunillanneqarsinnaannginnermik annertunerulersitsivoq, misissortinnerit ikinnerusut, atuarfinniit/meeqqerivinniit angerlartitsinerit ikinnerusut, susassaqartitsinernik unitsitsinerit ikinnerusut il. il.

Europami nakorsaatinik nakkutilliisunit (EMA) meeqqanut 5-inik ukioqalereersimasunut COVID-19-imut akiuussutissaq akuerineqarpoq. 

Akuersinissamut misissuisoqarnerani meeqqat 5-it 11-llu akornanni ukiullit 3000-t peqataapput. Meeqqat kapitereernerup kingorna pitsaasumik iluaqutaasumillu COVID-19-imut illersorneqartartut misissuinerup takutippaa.

Peqqinnissaqarfimmi oqartussat akiuussusersuinissamut innersuussinerat meeqqat akornanni akiuussusersuinerup sunniutaanik isumannaatsuuneranillu uppernarsaatinik suliatigut naliliinermik kiisalu akiuussutissap COVID-19-imik napparsimalernissamut pinaveersaartitsisinnaaneranik naliliinermik aallaaveqarpoq 

Meeqqanik 5-11-nik ukiulinnik akiuussusersuinissamut ullut sumiiffiillu akiuussusersuinermut pilersaarummi corona.nun.gl-imi nalunaarutigineqarumaarput.

Meeqqat akiuussutissamik Pfizer-BioNTech-imeersumik meeqqanut 5-11-nut ukiulinnut akuerisaasumik neqeroorfigineqassaaq.

Meeqqat inersimasunit annikinnerusumik akiuussuserneqartarput. Akiuussusersuisarfimmi sulisut eqqortumik annertussusiinissaminnut sungiusarneqarnikuupput, taamaattumik qularissanngilat meeqqavit eqqortumik akiuussuserneqarnissaa. 

Meeqqat siullermeerluni aappassaaneerlunilu akiuussuserneqarfissap akornanni 12-inik ukioqaleruni siullermeernermi aappassaaneernermilu annikinnerusumik akiuussuserneqassaaq.

Pitsaanerpaamik illersuuseqqullugu marloriarluni akiuussutissamik kapineqassaaq. Siullermeerluni kapitereerneranit sap. ak. pingasut qaangiunnerani aappassaanik kapitissaaq. Maannamuugallartoq meeqqat pingajussaanik akiuussuserneqarnissaat pilersaarutigineqanngilaq.

Akiuussutissat COVID-19-imik napparsimalernissamut illersuutaalluarput. Meeqqat tamakkiisumik illersuuserneqarnissaminut marloriarluni kapitissaaq.

Meeqqat 5-11-nik ukiulik nammineerluni ilisimatinneqareerluni akiuussuserneqarnissamut akuersisinnaanngilaq. Taamaattumik angajoqqaaq/t angajoqqaatut oqartussaassulik, meeqqap akiuussuserneqarnissaanut akuersisinnaasoq peqataassaaq.

Akuersissutit akiuussusersuisumik oqaatsitigut ilisimatitsinikkut pineqassaaq. Aallaaviusumik angajoqqaap aappaannaata akuersinera naammanngilaq. Angajoqqaatut oqartussaassusillit isumaqatigiinngittarnerat ilisimaneqarpat tamanna atuutissanngilaq.

Akiuussusiineq angajoqqaatut oqartussaassusillit tamarmik annerusumik aalajangiiffigisassaattut isigineqanngimmat aallaaviusumik angajoqqaatut oqartussaassusillip aappaannaata akiuussusersuinermi akuersisinnaanera tunuliaqutaavoq

Nakorsaq tamatigut akiuussutissamik kapisinermi akisussaasuusassaaq Sulisut akiuussusersuinermik ilinniarsimasut meeqqannik akiuussusiisuussapput. Peqqissaanermik sulialinnik, oqaloqatigisinnaasassinnik ikiuussinnaasunillu isersimasoqartuaannassaaq.

Kingunerluutit nalinginnaasut sakkukitsut

Akiuussutissat tamarmik kingunerluuteqartarnerat nalinginnaavoq. Tamanna meeqqanut inersimasunullu atuuppoq. Nalinginnaasumik sakkukitsumik sivikitsumillu kingunerluuteqartarput, timip akiuussutissaata akiuussutissamut qisuariarneranut takussutissaasumik.

Akuersinissamut misissuisoqarnerani kingunerluutit sakkukissimapput, meeqqanilu annerni inersimasunilu takusanut kiisalu meeqqanut akiuussutissanut allanut sanilliunneqarsinnaallutik.

Kingunerluutaagajuttut tassaapput:

  • Meeqqap kapitiffiata annernarnera aappilleqqaneralu
  • Kissarneqarneq
  • Uulikullattarneq
  • Nukikkut naggussakkullu anniarneq
  • Niaqorlunneq
  • Qasoqqaneq

Kingunerluutit sakkukitsut nalinginnaasuupput ullunilu ataasiakkaani atuuttarlutik.

Kingunerluutit qaqutigoortut

Qaqutigoortumik sapigaqarnermik qisuariartoqarujussuarsinnaavoq, assersuutigalugu akiuussutissami akut sapernerisigut. Meeraq assersuutigalugu nakorsaatinik sakkortuumik sapigaqartoq nalunngikkukku, inummut akiuussutissamik kapisisussamut oqaatigissavatit. COVID-19-imut akiuussutissalerneqarnissamut atatillugu, sapigaqarnermik qisuariaatit qaqutigoortut isumaginissaanut peqqissaanermik sulialimmik piareersimasoqartuassaaq.

Meeqqat akiuussuserneqarnissaat pillugu akuersinissamut misissuinerni kingunerluutinik ernumanartunik takusaqartoqanngilaq. Siunissami ungasinnerusumi  kingunerluuteqartitsinissamut aarlerinaat ataatsimut isigalugu annikitsuararsuuvoq, akiuussutissallu isumannaatsorujussuartut isigaavut, aamma meeqqanut.

Nunatta Nakorsaaneqarfiata europamilu nakorsaatinik nakkutilliisut akiuussutissat akuerineqareeraangata, sunniutaasigut kingunerlutsitsinerisigullu nakkutigeqqissaartarpaat.  Tamanna nakorsaatinut tamanut tunngatillugu nalinginnaasumik periuserineqartarpoq. Nakkutilliinermi kingunerluutaasinnaasumik nalunaarsuisoqarpat, kingunerluut akiuussutissamik pissuteqarnersoq nalilerniarlugu piaartumik misissuinermik aallartitsisoqartarpoq.

COVID-19-imut akiuussutissamik kapitinnermi kingunerluutinut tunngasut uani atuarsinnaavatit.

Tallimaniit aqqanilinnut ukiulinnut akiuussutissap kingunerluuteqarsinnaaneranut naliliinissatsinnut paasissutissatigut tunngavissaqanngilagut, tamatumani meeqqat akiuussuserneqareersut piffissap sivisuup ingerlanerani malinnaaffigineqarnissaat piumasaqaataassammat.

Akiuussutissaq Pfizer-BioNTech-imeersoq inersimasunut ukioq ataaseq sinnerlugu atorneqareerpoq, tassanilu kingunerluutinik nutaanik siusinnerusukkut takusimanngisanik nassaartoqanngilaq.

Tallimaniit aqqanilinnut ukiullit akiuussuserneqarnissaat pillugu akuersinissamut misissuisoqarnerani meeqqat arlallit qaammatit pingasut tikillugit malinnaavigineqarput. Piffissami tassani kingunerluutigisassat amerlanersaasa takunissaat naatsorsuutigineqarpoq. Nakorsaatinik nakkutilliisut akiuussutissat akuerineqareernerini nakkutigisarpaat, taamaalillutik akiuussuserneqarneq annertunerusumik aarlerinaateqassappat imaluunniit siunissami ungasinnerusumi kingunerluuteqartoqassappat qisuariarsinnaaniassagamik.

Akiuussutissap atorneqalereernerani, akiuussutissaq uummatip nukiinik aseruuttoornermut (myokarditis) aamma uummatip ameraasaanik aseruuttoornermut qaqutigoortorujussuarnut attuumassuteqaratarsinnaasoq paasineqarpoq. Qaqutigoortorujussuarmik inersimasunik akiuussuserneqareernerminni uummatip nukiinik aseruuttoortunik aamma uummatip ameraasaanik aseruuttoortunik nassaartoqartarsimavoq. Ulorianarpasittorujussuartut nipeqarpoq, kisianni amerlanerpaanut nammineerluni qaangiutissaaq. Angutini inuusuttuni takussaaneruvoq, kisiannili aamma qaqutigoortorujussuarmik. Qaqutigoortumik nakorsamit suliarineqarnissaq pisariaqartillugu, suliaritinnissamut periarfissaqarluarpoq 

Akuersinissamut misissuinerni meeqqamik uummatip nukiinik aseruuttoortoqaranilu uummatip ameraasaanik aseruuttoortoqarsimanngilaq. Akiuussutissat atorneqartut annikinnerunerata meeqqanut annerusunut sanilliullugu kingunerluuteqartitsinissaanut aarlerinaammik annikillisitsisinnaanera ilimanaateqarpoq. 

Kingunerluut qaqutigoortuuvoq, ataatsimullu isigalugu sakkukinnerulluni. Qaqutigoortorujussuarmik ulorianarnerulersinnaavoq, taamaattumik ersiuteqaraanni nakorsamut sianertoqartassaaq. Ersiutit tassaanerusarput anernikilliorneq, sakisserinerit uummammillu kassuttoorneq assigiinngisitaarsinnaasoq.

Meeqqat COVID-19-imik tunillatsereernikuusimagaluarpat akiuussuserneqassasoq innersuussutigaarput. Taamatut isumaqarpugut, coronavirus-imik tunillanneqareernerup kingorna timip nappaammut akiuussinnaanerata annertussusaa nikerarsinnaammat, akiuussuserneqareernerulli kingorna timip nappaammut akiuussinnaanerata annertussusaata naammannerunera qularutiginnginnerugatsigu.

Meeqqat siusinnerusukkut tunillatsissimappat, meeqqavit akiuussuserneqarnissaa ulorianaateqanngilaq. Meeqqavit qaammami ataatsimi ersiuteqarsimannginnissaa utaqqiinnassavarsi.

Meeqqat kissarneqalaaginnarsimaguni aseruunneqalaarluniluunniit, ass. nuallunni, suli akiuussuserneqarsinnaavoq. Meeqqat 38˚ sinnerlugu kissarneqaleriataarluni napparsimaguni, akiuussusertinnissani kinguartittariaqassavaa.

COVID-19-iusinnaanera eqqarsaatigiuaannaruk. Meeqqat COVID-19-imik nappaateqarpat imaluunniit COVID-19-iusinnaanera pasitsaakkukku, akiuussuserneqanngikkallassaaq.

Meeqqat amerlanerpaat akiuussusertinnissaq saperneq ajorpaat. Aaamma meeqqavit nerisassiat naasullu pujoralaasa ilaat saperaluarpagit imaluunniit timimi akiuussutissakikkaluarpat.

Meeqqat ataasiakkaat akiuussutissamik sapigaqassapput, ass. meeqqat qularineqanngitsumik akiuussutissamik sapigaqartut. Meeqqavit akiuussutissaq sapinnginneraa nalornissutigigukku, peqqinnissaqarfik saaffigissagit innersuussutigaarput.

Meeqqavit eqqissisarnissaanut aajuku siunnersuutitsialaat:

  • Meeraq pisussamut pisinnaasat tamaat piareersaruk
  • Meeraq akiuussuserneqarnermini issiassanersoq, nikorfassanersoq, tasiorneqassanersorluunniit aperiuk
  • Meeqqat pissangappat, itisuumik anersaartortillugu misilissinnaavat.
  • Angajoqqaatut eqqissisimanissat pingaaruteqarpoq.

Angajoqqaatut ilisimasaqarnerorusuppit pitsaasunillu siunnersorneqarlutit? Meeqqanik tallimanit aqqanilinnut ukiulinnut COVID-19-imut akiuussusersuinerit pillugit quppersagaaraq una atuaruk.

Kingullermik nutarterneqarpoq