Mianersornissamut malittarisassat nakorsallu aalajangiinera imaluunniit peqqissuseq pissutaalluni kikkut akiuussutissamik kapitinnginnissaannut innersuussutit

Kina akiuussutissamik kapiteqqusaanngila?

Inuit sapigaqarnertik pissutigalugu akiuussutissap akuutissaanut ataatsimut arlalinnulluunniit timaat sakkortuumik qisuariarsimappat, inuit macrogoler/PEG/polyethylene glycol sapigaqartutut ilisimaneqartut taakkununnga ilaapput.

Inuit, Comirnaty® imaluunniit COVID-19 Vaccine Moderna® siullermeerlutik kapitinnerminni sapigaqarnertik pissutigalugu ingerlaannaq toqussutaasinnaasumik qisuariartut akiuussutissamik aappassaaneerlutik kapitittariaqanngillat.

Akiuussutissamik kapuuinermi kikkut inuit immikkut mianersorfigineqassappat?

Inuit, akiuussutissanik allanik kapineqarnerminni ingerlaannaq toqussutaasinnaasumik qisuariarsimasut, nakorsaammik kapineqarnerminni imaluunniit nakorsaatinik iisartakkanik arlalinnut arlaleriartarlutik ingerlaannaq qisuariartarsimasut/sapigaqarnertik pissutigalugu toqussutaasinnaasumik qisuariartartut, covid-19-imut akiuussutissanik kapitinnginnerminni nakorsamit naliliiffigineqartariaqarput. Pingaartumik inuit akuutissanut polyethylenglykol (PEG) suli paasineqarsimanngitsumik sapigaqarsorisinnaasat maluginiarneqassapput.

Akiuussutissamik kapitinneq, sapigaqarnermik qisuariarnikkut toqussutaasinnaanera pissutigalugu, immikkut nakkutigisaasumik napparsimmavimmi taamannak suliaqarnermik sungiusimasalinnit suliarineqassanersoq naliliisoqassaaq.

Kikkut akiuussutissamik kapitinnissaminnik kinguartitsisariaqarpat?

Inuit maanna covid-19-imik napparsimasut imaluunniit misissorneqarlutik akissutissamik utaqqisut, qulaaniittoq takuuk.

Aamma inuit 38°C sinnerlugit kissarneqartut imaluunniit napparsimanermut nalinginnaasumut ersiutillit kapitinnissartik peqqissinissaminnut kinguartittariaqarpaat. Innuttaasup nammineerluni kapitiffissani taamaatillugu nalunaarutigissavaa kapitinnissaminullu piffissamik nutaamik inniminniilluni.

COVID-19-imut akiuussutissamik kapitissimagaanni kingornalu covid-imik napparsimanerluni misissugassamik tigusiffigitilluni – akiuussutissaq misissukkap inerneranut sunniuteqassava?

Naamik. Kalaallit Nunaanni covid-19-imut akiuussutissat marluk atorneqartut PCR-imik misissuinermut imaluunniit pilertortumik misissuinerup inerneranut sunniuteqarnavianngillat. Misissuinerit taakkua takutittarpaat nappaammik atugaqartoqarnersoq.

Akiuussutissamik kapitinnerup kingorna inuup timaata akiuussutissaqassusaa misissorniarlugu tigusisoqarpat, akissutaa kapitissimanermit sunnerneqarsimasinnaavoq.

Akiussutissat pillugit paasissutissat allat

COVID-19-imut akiuussutissamik kapineqarnissamut neqeroorut pillugu aalajangertinnak akiuussutissat pillugit paasisaqarnerorusukkuit, Nunatta Nakorsaaneqarfiata siunnersuutigaa ilisimasat pisortaneersut tatiginartuneersullu pissarsiariniassagitit. Assersuutigalugu akiuussutissat isumannaatsuunerinik akuerineqarnissaanullu periutsit pillugit paasissutissat nittartakkani ukunani atuarsinnaavatit:

• World Health Organization. Coronavirus disease (COVID-19): Vaccines safety

• Europa Kommissionen: Godkendelsesprocedure for COVID-19-vacciner

• Sundhedsstyrelsen: Godkendte vacciner i Danmark

Kingullermik nutarterneqarpoq Tuesday 23. november