Naartusunut milutsitsisunullu akiuussutissaq

Naartusut milutsitsisullu maannakkut COVID-19-imut akiuussutissamik neqeroorfigineqarput. Neqeroorut nammineq piumassuseq malillugu pineqarsinnaavoq akeqaranilu.

Akiuussutissat Pfizer-BioNTech aamma Moderna Kalaallit Nunaanni atorneqartut tamarmik sunniuteqarluartutut akuerisaapput aamma naartusunut milutsitsisunullu isumannaatsuullutik. Akuersissuteqarnerit ilisimatusarnikkut misissuinerit aamma sunniutaat kingunerluutaasinnaasullu pillugit paasissutissat tunngavigalugit pipput.

Aamma Danmarkimi, Europamilu nunani allani amerlanerni USA-milu
akiuussutissaq naartusunut milutsitsisunullu neqeroorutigineqarpoq.

Innersuussutit

  • Naartuguit akiuussutissamik kapitinnissat aatsaat trimesterit aappaanni pingajuanniluunniit pinissaa, tassa imaappoq naartuninni qaammatit sisamassaanni innersuussutaavoq. Mianersortumik tunngaveqarneq pissutigalugu trimesterit 1-iani, tassa naartuninni qaammatit siulliit pingajuanni, akiuussutissamik kapitinnissat inassutigineqanngilaq.
  • Milutsitsiguit akiuussuserneqarsinnaavutit, qanoq sivisutigisumik milutsitsisimanerit imaluunniit qanga ernisimanerit apeqqutaatinnagu.

Pfizer-BioNTech-imit aamma Moderna-mit akiuussutissat, Kalaallit Nunaanni atorneqartut, naartusunut milutsitsisunullu akuerisaapput. Taakku naartusunut milutsitsisunullu illersuuteqarput inuit naartunngitsut milutsitsinngitsullu assigalugit sunniuteqartunik.

Danmarkimi Sundhedsstyrelsen naapertorlugu COVID-19-imut akiuussutissap meeqqamut anaanaanullu ulorianaateqarnera ersiuteqanngilaq. Akiuussutissinneqarnermi anaanaasup akiuussutissai meeqqamut aak imaluunniit anaanaata immua aqqutigalugu ingerlateqqinneqassaaq. Pasinartoqanngilarli akiuussutissap naartumut erlaaq imaluunniit anaanaasup immua aqqutigalugu ingerlateqqinneqartarnera.

Naartusut milutsitsisullu akiuussutissap kingunerluutigisinnaasaanik allat assigalugit malugisaqarsinnaapput. Tassa imaappoq, naartusut milutsitsisullu aamma sunniutinik annikinnerusumik malugisaqarsinnaapput, soorlu qasuneq, niaqorlunneq aamma kissarneqartutut misigineq. Inuit allat naartunngitsut milutsitsinngitsullu assigalugit, qaqutigoortumik kingunerluutit ilungersunarnerusut naammattoorneqarsinnaapput aamma sapigaqartutut qisuariaateqartoqarsinnaalluni.

Danmarkimi Sundhedsstyrelsen naapertorlugu COVID-19-imut akiuussuserneqartut naartuminnik katatsisoornissaat, naartup ajoquteqarnissaanut imaluunniit inorluni inunngornissaanut annertunerulerneq ajorpoq, soorlu aamma kingunerluutinut isumakuluuteqartoqanngitsoq.

Kalaallit Nunaanni Peqqinnissamut oqartussaasunit akiuussutissat sunniutaatigut aamma isumannaatsuunerinut paasissutissat ingerlaavartumik malinnaavigineqarput.

Akiuussutissaq coronavirusimut illersuisooqataavoq neqeroorutaavorlu pingaarutilik, pingaartumik inunnut ilungersunartumik napparsimalersinnaasunut.

Naartusut milutsitsisullu amerlanerit sakkukitsumik napparsimasarput coronavirusimik tunillanneqarsimagunik, naartusulli ikittut ilungersunarnerusumik napparsimasinnaapput.

Danmarkimi Sundhedsstyrelsen naapertorlugu nunani allani misissuinerit takutippaat, naartusut akornanni peruluttunut immikkoortoqarfimmi unitsinneqarnissaq marloriaammik ilimanaateqarnerusoq, taakku COVID-19-imik nappaateqarpata. Misissuinerit aamma takutippaat inortumik erninissaq nukinginnartumillu pilatsilluni erninissaq 2-3-riaammik ilimanaateqarnerusartoq. COVID-19-ip peruluutiginissaa, assersuutigalugu diabetes-imik, astma-mik uummatikkut/taqqakkut nappaatilinnut, pualavallaartunut aamma 35-t sinnerlugit ukiulinnut ilimanaateqarneruvoq.

Milutsitsisunut COVID-19-imik peruluuteqarsinnaanerat annertunerunngilaq.

COVID-19-imut akiuussutissamik kapitinneq pillugu naartusunut milutsitsisunullu paasissutissaq uani atuarsinnaavat:

COVID-19-imut akiuussutissamik kapitinneq pillugu naartusunut milutsitsisunullu paasissutissiineq