Ullup unnuallu kingulliup ingerlanerani nunatsinni inuit aqqanillit tunillatsissimasut nassaarineqarput. Taakkunannga marluk Nuummiipput, ataaseq Upernavimmiilluni aammalu arfineq pingasut Sisimiuniillutik.

Tallimanngorpat 20. aggustimi nal. 9.00 aamma 11.00 akornanni Upernavimmi Peqqissaavimmi piffissamik inniminneeqqaarani misissortittoqarsinnaavoq.

Ullumikkut tunillatsisimasut nutaat paasineqareernerisa kingorna Nuummi Misissuivivimmi misissortikkiartortut tunuleriaapput. Tamanna Misissuiviup sivisunerusumik ammanissaa aalangiunneqarneranik kinguneqarpoq, taamaasillunilu misissortinniarlutik takkuttut tamarmik misissortissinnaasimapput. Nal. 8.30-miit 15.00-p tungaanut misissortittut katillugit 513-iusimapput.

Nalunarutini nutaani – nal. ak. 48-it iluanni covid 19-imut misissortissimanermi tunillatsissimannginnermut uppernarsaatillit pinnatik, imerniartarfinnut,- kulturimut tunngasunik aaqqisuussinernut-, illup iluani silamilu periarfissanut assigisaannullu ornigunniaraanni, covid-19-imut tamakkiisumik akiuussutissinneqarsimanissaq piumasaqaataavoq.

Ullumi Nuummi tunillatsissimasinnaasunik misissuinermut atatillugu misissugassat 90-it tiguneqarput – taakkunannga tunillatsissimasunik allanik nassaartoqanngilaq. Tamannali tuniluunnerup uninneranik isumaqanngilaq. Tunillatsissimasinnaasut tamarmik angerlarsimaannartussaapput.