Ullumi Nuummi misissortittut akornanni tunillatsittoqarsimanngilaq
Kingullermik nutarterneqarpoqUllumi Nuummi tunillatsissimasinnaasunik misissuinermut atatillugu misissugassat 90-it tiguneqarput – taakkunannga tunillatsissimasunik allanik nassaartoqanngilaq. Tamannali tuniluunnerup uninneranik isumaqanngilaq. Tunillatsissimasinnaasut tamarmik angerlarsimaannartussaapput.
Nuummi Misissuivik aqagu pingasunngornermi 16. juunimi nal. 09.00 – 09.30 akornanni inuit kaffillernermut apersortittoornermulluunniit atatillugu akuusimasut, allatulluunniit tunillaaviusinnaasuni isersimasimasut sinnerinut ammassaaq.
Tunillatsissimasunut qanillisimasut tamarmik tunillatsissimasinnaanermiit sivikinnerpaamik ulluni arfineq marlunni angerlarsimaannassapput. Qanillisimasinnaasut angerlarsimaannartussaajunnaannginnerminni misissorteqqissapput.
Tunillatsissimasinnaanermiit ullut 14-it tikillugit ersiuteqalernissap eqqumaffigineqarnissaa pingaaruteqarpoq, aammaluunniit ullumi aqaguluunniit covid-19-imut misissuinermi tunillatsissimannginneq paasineqaraluarpat.
Malunniutit eqqumaffigisassat suunersut corona.gl-imi takuneqarsinnaapput, aammalu tassani qanoq iliorluni tuniluutsitsinaveersaartoqarsinnaanersoq, qaqugulu illoqarfimmi najukkanni akiuussutissanik kapuisoqassanersoq takuneqarsinnaapput.
Ulluni tullerni tunillatsissimasup Ilulissaniittup attaveqarfigisimasai malinnaaffigineqassapput.