Tunillatsissimasumut qanillisimasunut najoqqutassat nutaat
Kingullermik nutarterneqarpoqAllannguutip Omikron-ip piffissami kingullermi annertusiartornera aamma inuiaqatigiinni COVID-19-ip annertuumik siaruaannera pissutigalugit tunillatsissimasumut qanillisimasunut najoqqutassat nutaat atuutsinneqalerput.
Allannguutit pingaarnerit tulliuttumi tulleriiaarneqassapput.
Qanimut qanillisimasatit illit nammineq paasiniassavatit
COVID-19-imik tunillanneqarsimaguit, taava illit nammineq qanillisimasavit attaviginissai ilisimatinnissaalu akissussaaffigissavat.
Qaqugukkut qanimut qanillisimasoqartarpa?
Qanimut qanillisimasat pillugit nassuiaat nutaaq tassaavoq, inoqutigiinni inuit tunillatsissimasumut qanimut qanillisimasut.
Tunillatsissimasumut qanillisimassaatit 1) piffissami tuniluuffiusumi inummut tunillanneqarsimasumut qanillisimaguit peqatigitillugulu 2) tulliuttuni minnerpaamik ataaseq naammassisimagukku:
- Illoqatigiinni inummik COVID-19-imik nappaateqartutut paasineqarsimasumik najugaqateqaruit
- Arnaateqaruit angutaateqaruilluunniit COVID-19-imik nappaateqartutut paasineqartumik (najugaqatiginngisamik)
- Efterskolemi, højskolemi, lejrskolemi assigisaanniluunniit COVID-19-imik nappaateqarluni paasineqarsimasumik ineqateqaruit
- Qaaqqusat/pinnguaqatit unnuisimappata
Quppernermi matumani piffissaq tuniluuffiusoq pillugu paasissutissat nassaarisinnaavatit.
Qaqugukkut tunillatsissimasumut qanillisimasut misissortissappat aamma mattusimassappat?
Tunillatsissimasumut qanillisimaguit, pingajussaanillu akiuussuserneqarnak/booster-imik imaluunniit siusinnerusukkut tunillatsissimanngikkuit, taava innersuunneqarputit:
- Piaartumik angerlarsimaannalissasutit
- Inummut tunillatsissimasumut avissaaqqasinnaanngikkuit/immikkoortinneqarsinnaanngikkuit (assersuutigalugu meeqqamut tunillatsissimasumut angajoqqaatut), mattusimanissannik innersuunneqarputit.
- PCR-imik misissortinnissat. Qaqugukkut misissortinnissannut qanga kingullermik tunillatsissimasumut qanillisimanerit apeqqutaassaaq.
Inummut tunillatsissimasumut qanillisimaguit pingajussaanilli akiuussuserneqarsimallutit/booster-imik imaluunniit sapaatip akunnerini 12-ini kingullerni COVID-19-imik tunillanneqareersimaguit, taava malittarisassat allat atuupput. Uani pingajussaanik akiuussuserneqarsimasut imaluunniit siusinnerusukkut tunillanneqareersimasut pillugit tunillatsissimasumut qanillisimasunut malittarisassat atuarsinnaavatit.
Attaveqarfigisimasat allat
Siusinnerusukkut najoqqutassani tunillatsissimasumut qanillisimasutut taaneqartut massakkut “attaveqarfigisimasat allat”-tut naatsorsuutigineqalerput. Attaveqarfigisimasat allat tassaapput inuit, COVID-19-imik tunillatsissimasup piffissami tuniluuffiusumi angerlarsimaffiup avataani qanillisimasat. Attaveqarfigisimasat allat tassaanerusarput ilagisartakkat, imaluunniit ulluinnarni akulikitsumilluunniit peqatigisartakkat.
Attaveqarfigisimasat allat akornanniikkuit innersuunneqarputit:
- Sapaatip akunnerini kingulliit 12-it iluini illit nammineq tunillanneqarsimanngikkuit tunillatsissimasumut qanillisimaninniit ullut sisamassaanni PCR-testertinnissat.
- Akiuussuserneqarsimaguit akiuussuserneqarsimanngikkuilluunniit mattusimannginnissat – COVID-19-ip ersiutaanik peqanngikkuit
Atuarfinni, meeqqerivinni allanilu tuniluunneq
Atuarfinni, meeqqerivinni allanilu tuniluuttoqartillugu taakku attaveqarfigisat allatut naatsorsuutigineqakkajupput.
Ulluunerani neqeroorummi, atuarfimmi imaluunniit sunngiffimmut atatillugu meeqqat inummut tunillanneqarsimasumut attaveqarfigisimasatut allatut naatsorsuunneqartut taakkununnga innersuussutit malissavaat.
Peqqissilluni nalunaarneq:
COVID-19-imik tunillanneqaruit, Nunatta nakorsaaneqarfiata peqqissisimasutut nalunaaruteqartarneq pillugu tamanut nalunaarutigineqartoq tunngavigalugu mattusimanerit unitsissinnaavat peqqissisimasutullu imminut nalunaarutigalutit. Quppernermi uani qaqugu peqqissisutut nalunaaruteqarsinnaaninnut piumasarineqartut nassaarisinnaavatit.
Taamaalillutit Peqqinnissaqarfimmiit peqqissisimaneq pillugu nalunaarfigineqassanngilatit (ataasiakkaanulli atuutinngilaq).