Qanimut attaveqataaguit

Tunillatsinnikoq attaveqarfigisimagukku tunillatsinnissannut aarlerinartorsiorputit, tamannalu tassaasinnaavoq “qanimut attaveqaat” imaluunniit “allatut attaveqarneq”. Taamaattoqaqrtillugu malittarisassat ataani taaneqartut malissavatit.

Qanimut attaveqaataaguit nalinginnaasumik attaveqarfigineqassaatit Coronamut Allattoqarfimmit qanimut attaveqaatinik paasiniaasartunit sianerfigineqassaatit.

Qanimut aattaveqarfigineqarsimavutit inummik piffinni ukunani qanimut attaveqarsimaguit:

  • Tunillatsissimasoq ersiutilik: Tunillatsissimasup ersiuteqalernissaanut 48 tiimit iluanni ersiutaarunnissaatalu tungaanut 72 tiimit iluanni.
  • Tunillatsissimasoq ersiuteqanngitsoq: Tunillatsissimasup misissortinnissaanut 48 tiimit iluanni misissortereerneratalu kingorna ullut qulit qaangiuppata.

Piffinni siuliani taaneqartuni tunillatsissimasoq qanimut attaveqarfigisimagukku tullinnguuttunilu minnerpaamik ataaseq ilinnut atuuppat tassaavutit qanimut attaveqarfigisimasaq:

  • Tunillatsissimasumik najugaqateqarputit.
  • Tunillatsissimasumik timikkut toqqaannartumik attuisimavutit (assersuutigalugu eqitaarinnissimavutit), imaluunniit illersuuteqanngitsumik toqqaannartumillu qanermit nuammik atugaqarsimavutit (assersuutigalugu tunillatsissimasumit quersorfigitissimavutit tangajorfigitissimallutilluunniit imaluunniit pineqartup kakkissarfikuanik qanermulluunniit assiaqutaanik assigisaanilluunniit attuisimavutit).
  • 15 minutsinit sivisunerusumik tunillatsissimasumut (assersuutigalugu oqaloqatigiinnermi) 2 meterimik qanillisimaguit.
  • 15 minutsinit sivisunerusumik tunillatsissimasoq pisuni tullinnguuttuni 2 meterinik ungasissuseqarlusi sumiiffimmi tunillaaffioratarsinnaasumi ilagisimavat:
    • Pisuni sakkortuumik silammut anersaartorfiusuni, assersuutigalugu erinarsorneq, nipituumik oqalunneq nillianerluunniit.
    • Pisuni timimik ilungersortitsiffiusuni, assersuutigalugu timigissarneq imaluunniit yoga.
    • Ininini matoqqasuni silaannarluttunilu isersimaneq.

Piffiit marluk aappaanni taaneqartuni tunillatsissimasoq qanimut attaveqarfigisimanngikkukku qanimut attaveqartuunngilatit.

Illit qanimut attaveqarfigineqarsimanerit pillugu najugaqatitit qanimut attaveqarfigisimasatut taaneqassanngillat. Misissortinnikkut tunillatsissimasutit paasineqarpat najugaqatitit qanimut attaveqarfigisimasatut aatsaat taaneqarsinnaalissapput, imminnut mattutissapput misissortissallutillu.

Tunillatsissimasumut qanillisimaguit misissorneqartinnak tunillatsissimanerlutit paasisaqarfigisinnaanngilat. Taamaattumik qanillisaqarsimaguit tunillatsissimasutullusooq iliuuseqassaatit PCR-imut misissortinnivit akissutissarsinissaata tungaanut. Taamaattumik – tamakkiisumik akiuussusertinnikuugaluarlutilluunniit – ima iliussaatit:

  • Angerlarsimaffimmi mattusimagit
  • Tunillatsissimasumut kingullermeerlutit qanillisimaninnit ullut arfineq-marluk qaangiunneratigut PCR-imut misissortinnissat isumagissavat. Aatsaat tunillatsissimanngitsutit misissuinikkut paasineqarpat mattusimanerit unitsissinnaanngussavat.
    Ullut arfineq-marluk sioqqullugit misissortissimaguit akissutisiassat eqqunngitsuusinnaavoq, tassa imaappoq tunillatsissimagaluarlutit tunillatsissimanngitsutut nalilertoorneqarsinnaavutit.
  • Eqqiluisaarneq, eqqiaaneq silaannarissarnerlu eqqumaffiginerukkit.

Akiuussusertissimagaluaruilluunniit akiuussusertissimannginnerpit nalaanisulli innersuussutit malissavatit. Qanillisaqarsimallutit paasigukku taava tunillatsissimasumut kingullermeerlutit qanillisimanerpit kingornatigut ullut arfineq-aappaanni misissortinnissat isumagissavat, qanillisimasutullu paasisaqarnerpit kingornagut misissortinnerpit tunillatsissimanngitsutit takussutissiinissaata tungaanut imminut mattusimatissallutit.

Tamanna akiuussutissaq 100%-mik sunniuteqartannginneranik peqquteqarpoq, taamaammallu tamakkiisumik akiuussuserneqaraluaraanniluunnit suli COVID-19-imik tunillatsinnissaq aammalu napparsimalernissaq annikikkaluartumik aarlerinaateqarpoq. Tamatuma saniatigut akiuussutissap, akiuussusertissimasup virusimik tunillatsereernermigut ersiuteqanngikkaluarluni allanik tunillaasinnaanera, pinaveersaartissinnaaneraa suli uppernarsarneqarsimanngilaq.