Angerlarsimalluni mattusimaneq

Mattunnermi inunnut angerlarsimaffiup avataaniittunut, kiisalu inoqutigiinni najugaqatigisimasinnaasanut allanut tunillaanaveersaarnissaq siunertarineqarpoq.

Inuk (akiuussusersuinermi killiffik apeqqutaatinnagu) piffissaq tunillaasinnaaffini tamakkerlugu mattusimasariaqarpoq:

  1. COVID-19-imut ersiuteqalernermini
  2. Antigentest imaluunniit PCR atorlugu misissuinermi COVID-19-imik tunillatsissimanermik paasisaqarnermini

Angerlarsimalluni mattusimanermi angerlarsimaannartariaqarput, taamaattorli ima iliorsinnaavutit:

  • Pisariaqalertinnagu, soorlu misissortinnissamut atatillugu angerlarsimaffiit qimassanngilat.
  • Allanut qanillinnginnissat, atuinnginnissat, ass. matut tigummiviinik atuinnginnissaq qulakkeersinnaagukku anillutit silaannarissarsinnaavutit

Pisariaqavissumik mattusimanerit ”unitsikkallassagukku” soorlu silaannarissarlutit pisuttuarninni, taava qanermut assiaqut CE-mik meqqilerneqarsimasoq atoruk.

Aamma uku malissavatit:

  • Allanut attuinaveersaarit, aamma najugaqatinnik
  • Sapinngisamik inimi immikkoortumi isersimasarit
  • Ajornanngippat perusuersartarfik uffarfillu immikkoortoq atoruk
  • Najugaqatinni napparsimaruluttoqalersinnaanera ulorianartorsiorfiunngippat angerlarsimaannarit
  • Angerlarsimaffinni mattussinnaanerit pillugu inoqutigiinni inuit sinnerinit akuersissummik pissarsigit
  • Ersiutitit ajornerulersinnaammata eqqumaffigiuk
  • Allanik pulaartoqarnaveersaarit
  • Najugaqatitit inimeeqatigigukkit qanermut assiaquteqarit
  • Kakkissarfimmut tallivilluunniit peqittarfiata nalaanut quersorlutilluunniit tangajortarit.
  • Qaat (soorlu nerriviup qaava assigisaalu) ullormut arlaleria allanit atorneqartartut asakulakkit
  • Akulikitsumik assatit errortortakkit
  • Tamatigut errortortarit:
    • Quersoreeraangavit/tangajoreeraangavit
    • Kakkissarfimmik atuereeraangavit
    • Perusuersartarfimmeereernermi
    • Nerinialernermi
  • Ullut tamaasa perusuersartarfimmik/uffarfimmik aamma igaffimmik kiisalu napparsimasup ini isersimaffigisartagaanik, nalinginnaasumik eqqiaanermi qaqorsaatit atorlugit eqqiaasarnissaq innersuussutigineqarpoq. Ataatsimoorussanik perusuersartarfeqarlunilu uffarfeqarsimappat, tunillatsissimasup atorsimasani nammineq eqqiassavai.
  • Matup tigummivii, erngup kuuffii allallu attorneqartartut akuttunngitsumik spritimik salittarnissaat innersuussutigineqarpoq.
  • Allarutit, oqorutit qalii iluatigullu atisat minnerpaamik 80 °C-imi errorneqartassapput. Atisat allat sapinngisamik minnerpaamik 60 °C-imi errorneqartassapput.
  • Angerlarsimaffimmut eqqiaajartortitsisoqassanngilaq.
  • Eqqakkat nalinginnaasumik poorneqassapput passunneqarlutillu
  • Eqqakkanik passussereernerup kingorna errortortoqartassaaq
  • Eqqakkat isumaqatigiissut malillugu ikiorteqarluni igitsikkiartortinneqassapput

Kingullermik nutarterneqarpoq