Manna tallimanniit aqqanilinnut ukiullit akiuussutissamik kapitissinnaalerput
Kingullermik nutarterneqarpoqMeeqqat tallimaniit aqqanilinnut ukiullit akiuussutissamik kapitissinnaanerat isumannaatsutut nalilerneqarmat, meeqqat tallimaniit aqqanilinnut ukiullit COVID-19-imut akiuussutissamik kapitinnissaannut neqeroorfigineqarput. Ukioqatigiinnut taakkununnga siullermeerluni akiuussusersuinissaq tallimanngorneq januaarip ulluisa 14-ianni Inussivimmi ingerlanneqassaaq.
”Meeqqat akiuussuserneqarnissaat innersuussutigaarput, pitsaanerusumik nappaalanersuarmik nakkutiginnissinnaalerniassagatta, maannakkut meeqqat ukiukitsut akornanni tuniluunneq annertusiartortillugu. Naak meeqqat qaqutiguinnaq COVID-19-imik sakkortuumik napparsimalertaraluartut, tuniluutsitsineq annikillisinneqarsinnaavoq taamaalillunilu allat illersorneqarlutik. Inuiaqatigiinni tuniluunneq annikillisinneqassaaq, taamaalilluta peqqissaaviit sapinngisamik pisariaqanngitsumik artukkinnginniassagatsigit, aammalu ulluinnarni inuunitsinnut nalinginnaanerusumut sungiusimanerusatsinnut ingerlaqqissinnaalerniassagatta”, Nunatsinni Nakorsaaneq Henrik L Hansen oqarpoq.
Meeqqanik akiuussusersuineq pillugu paasissutissat pingaarutillit:
- Meeqqanik akiuussusersuinermi neqeroorutigineqassaaq Pfizer-BioNTech, meeqqanut tallimanniit aqqanilinnik ukiulinnut atussallugu akuerisaasoq. Meeqqat inersimasuniit annikinnerusumik akiuussuserneqarneqassapput.
- Meeqqat pitsaanerpaamik illersorniarlugit marloriarlutik akiuussuserneqassapput. Aappassaanik kapitittoqassaaq siullermik kapitereernermit sapaatip akunneri pingasut qaangiunnerisa missaanni. Maannakkorpiaq meeqqat pingajussaanik akiuussuserneqassanersut pillugit suli erseqqissumik pilersaaruteqartoqanngilaq.
- Meeqqat aqqaneq marluk 15-illu akornanni ukiullit inersimasullu akiuussusertinnerannit ilisimaneqareersut saniatigut, meeqqat akornanni kingunerluuteqartoqarneranik nalunaaruteqartoqarnikuunngilaq.
Qaqugu qitornara akiuussusertissinnaava?
- Meeqqat tallimanit aqqanilinnut ukiullit qaqugu sumilu akiuussusertissanersut corona.nun.gl-ikkut akiuussusersuinissamut pilersaarummi nalunaarutigineqarumaarpoq.
- Malugiuk, meeraq akiuussusertittussanngorpat angajoqqaaq/angajoqqaatut akisussaassusilik peqataassammat, taassuma meeqqap akiuussusertinnissaa atsiornermigut akuersissutigisussaammagu.
Paasissutissat annertunerusut