Nuummi 18-init 39-inut ukiulinnut pingajussaannik akiuussusersuineq
Kingullermik nutarterneqarpoqNunatsinni peqqissaaviit arlallit ukioqatigiiaanut amerlisanut akiuussusersuillutik aallartereerput. Massakkut illoqarfiit pingaarnersaat tullinnguuppoq.
Suliniut Inussivimmi ulluni marlunni, pingasunngornermi januaarip 12-iani sisamanngornermilu 13-iani, immikkut ittumik akiuussusersuinikkut aallartinneqassaaq. Pilersaarut malillugu tamatuma kingorna pingajussaanik akiuussusertinnissamut neqeroorut Dronning Ingridip Peqqissaaviani akiuussusertinnissamut neqeroorutinut aalajangersimasunut ilanngutissaaq.
”Illoqarfinni allani sineriammilu pingajussaanik akiuussusersuinerit aallartilluareerput, neriuppungalu Nuummi aamma taamatut ingerlalluartigiumaartoq. Ersarissumik innersuussutigaarput, 18-init 39-inut ukiullit aamma pingajussaanik akiuussusertissasut. Akiuussutissat atuussinnaassusaat piffissap ingerlanerani annikilliartortarpoq, taamaattumik tunillatsinnissamut pitsaanerpaamik illersorneqarsinnaanissaq anguniarlugu kiisalu sakkortuumik napparsimanissaq pinaveersaarniarlugu pingajussaanik akiuussuserneqarnissaq pisariaqarpoq. Tamanna aamma akiuussutissat Coronapas-appimiittut piffissamik atuuffeqarnerinut pissutaavoq. Piffissaq aalajangersimasoq ingerlareerpat atuussinnaajunnaassapput, taava pingajussaannik akiuussusertissimanngikkaanni coronapassi atorsinnaajunnaassaaq,” Nunatta nakorsaanera Henrik L. Hansen oqarpoq.
Pingajussaanik akiuussutissaq pillugu paasissutissatsialaat:
Pingajussaanik akiuussusertinneq siusinnerpaamik aappassaanik kapitinnermit qaammatit sisamat sapaatit akunnerilu marluk qaangiunnerini pisinnaavoq. Ilinnut akiuussutissaq kapitinnerit siulliit marluk atorneqartoq neqeroorutigineqassaaq.
Modernamik pingajussaanik akiuussusertinnermi pingaarnertut akiuussutissap annertussusaata affaa atorneqarpoq.
Ataatsimut isigalugu pingajussaanik akiuussusertinnermi kingunerluutit ikinnerusutut sakkukinnerusutullu nalunaarutigineqarsimapput
Sumi qaqugulu pingajussaanik akiuussusertissinnaavunga?
Pingajussaanik akiuussusiinissat ullussaat sumiiffissaallu corona.nun.gl-ikkut akiuussutissamik kapuinernut pilersaarummi nalunaarutigineqassapput.
Paasissutissat annertunerusut
Pingajussaanik akiuussusersuineq pillugu paasissutissat annertunerusut uani paasiniarsinnaavatit.