Misissukkat tunillatsissimanermik inernillik amerlaneri pissutigalugu tuniluunnerit paasiniaaffigineri unammillerneqarput

Kingullermik nutarterneqarpoq

Nuummi misissuivimmi, qitiusumik laboratoria Cornamik Akiuinerlu ulluni makkunani ulapingaatsiarput.

Ulluni makkunani misissukkat tunillatsissimanermik inernillik amerlaneri pissutigalugu tuniluunnerit paasiniaaffigineri unammillerneqarput. Tuniluunnermik paasiniaasartut tunillatsissimasunut qanillisimasut tamaasa oqarasuaatikkut attaveqarfiginissaat pisinnaanngilaq, taamaammat innuttaasut tunillatsissimasut ikiuunnissaat pisariaqartinneqarpoq, tunillatsissimasut qanilisimasaminnut paasititsinissaat pisariaqartinneqarmat.

Qanillisimasatit nanineqassapput ilisimatinneqarlutillu

Inuit tunillassimasinnaasatit nalunaarsussavatit paasitillugillu. Taamaammat qanillisimasatit erngertumik attaveqarfigissavatit paasitillugillu tunillatsissimallutit. Qanillisimasat akiuussuserneqarsimanngippat ingerlaannaq mattutissaaq qanillineqarsimanermiillu ullut arfineq-aappassaani misissorneqassalluni. Qanillisimasat akiuussuserneqarsimappat ersiuteqarnanilu, taava mattusimasariaqanngilaq, taamaattorli qanillisimaneqarsimanermiit ullut sisamassani kiisalu ullut arfineq-aappassaani misissortissaaq.

Qanillisimasatit attaveqarfiginissaat pingaaruteqarpoq, tuniluunnermi paasiniaasartunit attavigineqarnissat utaqqissanngilat. Coronavirusimik tunillatsissimanerit pillugu piaartumik sulisitsisutit nalunaarfigissavatit. Sulisitsisuit suliffinni qanillisimasatit naninissaat suliaralugu aallatissavaat.

Paasissutissat uani atuarsinnaavatit:  https://corona.nun.gl/kl/tunillatsinneq-ersiutillu/tunillatsissimasumut-qanillisimaguit/

Misissortissimanermi akissuteqaatit sivisuneruneri

Qitiusumik laboratoria dec. 29-ani 30-anilu misissukkanik aatsaat taamak amerlatigisunik tigusaqarpoq. Misissukkat misissoqqissaarlugit ulloq unnuarlu sulisoqarpoq, taamaattorli ulluni makkunani akissuteqaammik nalunaarfigineqarnissaq pisarnermiit sivisunerunissaa naatsorsuutigineqartariaqarpoq. Misissugaq negativiutillugu SMS-ikkut nalunaarutigineqartarumaarpoq.