Inuussutissarsiutinik ingerlataqartunut ilitsersuut: Imaaliorlutit sullitavit akiuussusersuinermi killiffiat misissorsinnaavat

Kingullermik nutarterneqarpoq

Nuna tamakkerlugu killilersuinerit pillugit Namminersorlutik Oqartussat nalunaarutaat tunngavigalugu decembarip arfernaniit 2021-mi innuttaasut ininut tamanit iserfigineqarsinnaasunut isissagunik Covid-19-imut akiuussusersuinermi naammassinnissimanissaat, imaluunniit PCR-imik imaluunniit antigentestimik misissortinnermi tunillatsissimannginnermut uppernarsaammik, sivisunerpaamik nal. ak. 48-nik pisoqaassusilimmik takutitsisinnaanissaat piumasaqaataalerpoq.

Piumasaqaatit tunngaaviusumik nuna tamakkerlugu atuupput, kisianni illoqarfinni nunaqarfinnilu misissortinnissamut periarfissaqanngitsuni, aatsaat tuniluuttoqartillugu atuuttassaaq.

Killilersuinerit nutaat atuutilernerini ilaatigut innuttaasut 12-inik ukioqalereersimasut neriniartarfiliassagunik, katersugaasivimmut isissagunik, nujalerisuliassagunik assigisaanilluunniit pisassaqarunik akiuussusersuinermi killiffimmut imaluunniit misissortinnermi tunillatsissimannginnermut uppernarsaammik atuuttumik takutitsisinnaasariaqarput.

Suliffeqarfiit sullissiviillu il.il., ininik tamanit orninneqarsinnaasunik peqartut killilersuinerit malinneqarnerinik qulakkeerisinnaanissaat pingaaruteqarpoq. Uppernarsaatissaqarnissamut piumasaqaatip malinneqarnissaanik qulakkeerinermikkut inuiaqatigiinni tuniluuttoqarneranik annikillisitseqataassapput.

Ikiorsiissutitut suliffeqarfinnut sullissivinnullu il.il. maleruagassat arlallit, nalunaarummi aalajangersakkat malinneqarnissaannut atugassat suliarineqarput. Maleruagassat qanoq iliorluni sullitat pulaartullu uppernarsaataannik misissuisoqarsinnaanissaanut ilitsersuutaapput.

Uani maleruagassat, ilaatigut qanoq iliorlusi suliffissinni misissuisarnermut atuutsitsilersinnaanissamut siunnersuutitsialannik imaqartut nassaarisinnaavatit.

Aamma ininut isertunut ersarissunik paasissutissiisoqarnissaa inaassutigineqarpoq. Uani allagartarsuit nassaarisinnaavatit.

Uani killilersuinerit pillugit tusagassiorfinnut nalunaarutit atuarsinnaavatit.