Nuummi Upernavimmilu inuussutissarsiutinik ingerlataqartunut: Sullitassi akiuussusersuinermi killiffii imaaliorlusi misissorsinnaavasi
Kingullermik nutarterneqarpoqSapaatit akunnerata naanerani nalunaarutigineqarpoq, Nuummi Upernavimmilu aammalu nunaqarfiit ilaanni ininut tamanit iserfigineqarsinnaasunut isissagaanni, taakkulu silataannut pissagaanni COVID-19-imut akiuussusersuinermi naammassinnissimanissaq piumasaqaataalersoq. Killilersuinerit nutaat kingunerisaannik ilaatigut neriniartarfinnut, imerniartarfinnut, kulturip illorsuinut, timersortarfinnut, nujalerisunut il.il. isissagaanni akiuussuserneqarsimanermut uppernarsaammik atuuttumik takutitsisoqartussaavoq.
Suliffeqarfiit sullissiviillu, ininik tamanit iserfigineqarsinnaasunik peqartut taakkulu silataat killilersuinerit malinneqarnissarpiaasa qulakkeerniarneqarnerani pingaarutilittut inissisimapput. Uppernarsaateqarnissamut piumasaqaatip malinneqarnissaanik qulakkeerisarnermikkut inuiaqatigiinni tuniluunnermik annikillisaaqataassapput.
Maanna ikiortissatut Nuummi aamma Upernavimmi eqqaanilu suliffeqarfiit sullissiviillu qanoq iliorlutik sullitamik pulaartumillu uppernarsaateqarnerannik misissuisarsinnaanerannut maleruassiortoqarpoq.
Maleruagassat tamakkiisut nassaarisinnaavatit uani, taassumalu ilaatigut qanoq iliorlusi suliffeqarfissinni misissuisarnermik atuutsitsilersinnaanissassinnut siunnersuutitsialaat imarai.
Isaarissami ersarissumik allagartaliineq
Aamma inimut isaarissami ersarissumik paasissutissiisoqarnissaa inassutigineqarpoq. Allagartarsuarnik allagartanilluunniit, inuit atuuttumik uppernarsaatillit kisimik isersinnaanissaannik, taamaattumillu inuit uppernarsaateqanngitsut iseqqusaanngissinnaanerinik nalunaaruteqarfiusunik nivingasoqartariaqarpoq. Allagartarsuaq aaneqarsinnaavoq, uunga.
Killilersuinerit pillugit tusagassiorfinnut nalunaarut atuarsinnaavat, uani aamma nalunaarut pillugu, uani.