Tunillatsissimasumik qanillisaqarnermi: Suli suliartorsinnaavunga?

Kingullermik nutarterneqarpoq

COVID-19-imik tunillatsissimasinnaagaanni suliartortariaqarnissaq aalajangiiffigiuminaassinnaavoq. Tamakkiisumik akiuussutissinneqarsimaguit tunillatsissimasumut qanillisimagaluaruilluunniit suliartorsinnaavutit – napparsimanermut ersiuteqanngikkuit. Allaaserisami matumani qanillisaqarnermut maleruagassat katersorpagut.

Suliartorsinnaavit?

Qanillisaqarsimaguit aammalu tamakkiisumik akiuussutissinneqarsimaguit, napparsimanermullu ersiuteqanngikkuit angerlarsimaannassanngilatit. Tunillatsissimasumut kingullermik qanillisaqarninniit ullut sisamassaanni aamma arfineq aappassaanni misissorteqqullutit kaammattorneqarputit, kisiannili misissortinninnut akissummik utaqqininni suliartorsinnaavutit allallu akornanniissinnaallutit. Kisiannili ersiutinik takkuttoqariataarnissaa eqqumaffigissavat.

Tamakkiisumik akiuussutissinneqanngikkuit pissutsit allaapput. Qanillisaqarsimaguit aammalu akiuussuserneqarsimanngikkuit, imaluunniit ilaannaasumik akiuussuserneqarsimaguit ulluni arfineq marlunni angerlarsimaannassaatit. Tunillatsissimasumut kingullermik qanillisaqarninniit ullut arfineq aappassaanni misissortinnissamut kaammattorneqarputit.

Qanga tunillatsissimasumut qanillivit?

Qanga qanillisaqarsimanermut ersarissunik maleruagassaqarpoq. Ataatsimut isigalugu qanillisaqarsimasutut isigineqassaguit tunillatsissimasoq attorsimasinnaavat imaluunniit piffissami sivisuumi najorsimasinnaallugu. Taamaattumik tunngaviusumik qanillisimasut amerlanertigut tunillatsissimasumik najugaqaqateqartuusarput, assersuutigalugu ikinngutinut qaninnernut ilaquttanullu kunissisimasarput/pakkusimannissimasarput imaluunniit timikkut toqqaannartumik attorsimasaqartarlutik.

Sullivimmi assersuutigalugu suleqatit tunillatsissimappat aammalu minutsit 15-it sinnerlugit pineqartoq soorlu oqaloqatigalugu imaluunniit ataatsimeeqatigalugu 1 meterit inorlugit qanillisimasimagukku qanillisaqarsimassaatit.

Taamaallaat qanillisimasutut isigineqassaatit, tunngavissat uku naammassisimagukkit:

  • Piffissami tunillatsissimasup allanut tuniluussinnaaffiatut isigineqarsinnaasumi tunillatsissimasoq najugaqaqatigigukku
  • Inuk tunillatsissimasoq timikkut toqqaannartumik attorsimagukku, soorlu pakkullugu/kunillugu imaluunniit quersortoq/tangajortoq
  • Tunillatsissimasoq minutsit 15-it sinnerlugit soorlu oqaloqatigalugu imaluunniit ataatsimeeqatigalugu 1 meterit inorlugit qanillisimasimagukku

Attaveqarneq tunillatsissimasup piffissami tunillaasinnaaffiata ingerlanerani pisimassaaq:

  • Inuup ersiutillip misissortinnerminilu tunillatsissimasutut paasineqartup piffissaq tuniluuffigisarpaa: ersiuteqalernerup aallartinnera nal. ak. 48-t sioqqullugit aallartittumiit ersiuteqarunnaarnermiit nak. ak. 48-t tikillugit
  • Inuup ersiuteqanngitsup misissortinnerminilu tunillatsissimasutut paasineqartup piffissaq tuniluuffigisarpaa: Inuup misissortinneraniit nal. ak. 48-t sioqqullugit aallartittumiit misissortinnerup kingorna ullut arfineq aappaat ilanngullugu

Ersiuteqaruit angerlarsimaannarit

COVID-19-imut ersiuteqaleruit suliartortariaqanngilatit, kisiannili angerlarsimaannassaatit misissortillutillu. Tamanna tamakkiisumik akiuussutissinneqarsimagaluarit, akiuussutissinneqarsimanngikkaluaruit imaluunniit qaammatit pingasut kingulliit ingerlanerini tunillatsissimagaluaruit atuutissaaq.

Annertunerusumik atugaqarit

Qanillisimasunut malittarisassat uani nassaarisinnaavatit. Aamma qitornat tunillatsissimasumut qanillisimappat, imaluunniit qanillisaqanngikkaluarlutit tunillatsissimaguit qanoq iliussanerlutit tassani atuarsinnaavat.