28. juli 2021-mi Naalakkersuisut tusagassiortunik katersortitsinerannit pingaarnersiukkat

Kingullermik nutarterneqarpoq

Nalunaarut maanna atuuttoq Upernarfimmut nunaqarfiinullu, kiisalu Aasiannut sivitsorneqarpoq. Upernavimmi nunaqarfiinilu, kiisalu Aasianni assartuutinut tamanit atorneqartunut ilaalluni angalassagaanni akiuussutissamik kapitissimanermut uppernarsaateqarnissaq imaluunniit coronamut misissortinnermi tunillatsissimannginnermut uppernarsaateqarnissaq piumasarineqarpoq. Nuna tamakkerlugu akiuussutissamik kapitissimanermut uppernarsaateqarnissaq pisariaqartussaavoq.

Kalaallit Nunaanni akiuussutissanik kapuinermi aamma tuniluuttoqarnerani killiffiit

Tusagassiortunik katersortitsinermi peqataasut tamarmik erseqqissarpaat, ataatsimut isigalugu akiuussutissanik kapitissimanngitsut tunillatsittarsimasut aammalu aallanut tunillaasarsimasut. Akiuussutissanik kapuinermi naammassinnissimasunik taama annertutigisumik tunillatsittoqartarsimanngilaq, taamatullu qaqutiguinnaq allanut tunillaasarsimallutik. Tassalu tuniluunneq amerlanertigut inunnut akiuussutissanik kapuinermi naammassinnissimasunut anngukkaangami unittarpoq. Taamaattumik kikkut tamarmik akiuussutissamik kapitinnissaat suli kaammattuutigineqarpoq.

Qanittukkut akuersisoqarneratigut naartusunik milutsitsisunillu kapuinerit aallartinneqarput. Taamatut aamma 16-inik 17-inillu ukiullit pineqarput.

Nalunaarut sivitsorneqarpoq, kisiannili taamaallaat Upernavimmut nunaqarfiinullu, kiisalu Aasiannut

Nalunaarut killilersuinerit maanna atuuttut ilanngullugit 31/7-imiit sivitsorneqarput, kisiannili taamaallaat Upernavimmut Aasiannullu, kiisalu nunaqarfinnut ukununnga: Tasiusaq, Upernavik Kujalleq, Nutaarmiut, Nuussuaq, Innaarsuit, Naajaat, Aappilattoq, Kangersuatsiaq, Kullorsuaq.

Killilersuinernik sivitsuineq 10/8 ilanngullugu atuukkallassaaq.

Nunap sinnerani killilersuinerit maanna nalunaarummi taaneqartutut atorunnaassapput. Tassalu 31/7 aallarnerfigalugu nunap sinnerani, illoqarfiit marluk nunaqarfiillu taaneqartut pinatik, qanermut assiaqummik atuinissaq piumasaqaataajunnaassaaq. Taamatuttaaq inini sumiiffinnilu inuit tamat ornittagaanni inuit 20-t sinnerlugit katersuuteqqusaannginnerat atorunnaassaaq.

Ininut isernissamut akiuussutissamik kapitissimanermut uppernarsaat

31/7-imiit maanna killilersuutaasut inunnut akiuussutissanik kapuinerni naammassinnissimasunut annikilliartuaartinneqarnissaat pilersaarutigineqarpoq. Taamaattumik imerniartarfinnut, neriniartarfinnut, aaqqissuussinernut il.il. isernissamut akiuussutissanik kapitissimanermut uppernarsaateqarnissamut piumasaqaat atuutsikkallarneqassaaq.

Nalunaarut tamanut ammasumik saqqummiunneqarpat, akiuussutissamik kapitissimanermut uppernarsaat pillugu paasissutissat sukumiinerusut saqqummiunneqassapput.

Upernavimmi nunaqarfiinilu, kiisalu Aasianni assartuutinut tamanit atorneqartunut ilaanermut malittarisassat

Upernavimmi nunaqarfiinilu, kiisalu Aasianni assartuutinut tamanit atorneqartunut ilaanermut malittarisassanik atuutsitsisoqalerpoq. Malittarisassat atuutilernerini maanna assartuutinut ilaanissamut piumasarineqarpoq:

  • COVID-19-imut akiuussutissanik kapuinermi naammassinnissimanissaq
  • Nalunaaquttap akunnerisa 48-t iluanni COVID-19-imik tunillatsissimannginnermik uppernarsaaviusumik misissortissimanissaq
  • Nalunaaquttap akunnerisa 48-t iluanni misissortinnissaq taamaallaat neqeroorutigineqarsinnaavoq, najukkami peqqinnissaqarfik tamatumunnga isumalluutissaqarpat. Qanillisimasat aammalu inuit ersiutillit misissortinnissamut salliutinneqassapput.


Misissortinnermi COVID-19-imik tunillatsissimannginnermut uppernarsaammik takutitsisoqarsinnaassaaq.

Malittarisassat assartuutinut, soorlu bussinut, angallatinut ilaasunik angallassinissamut ilusiligaasunut aammalu aalajangersimasunik angallavilinnut, kiisalu silaannakkut angallatinut, Aasianniit aamma Upernavimmiit imaluunniit nunaqarfinniit aallartunut atuutsinneqarput.

Assartuutinut tamanit atorneqartunut malittarisassat matuma siuliani taaneqartut ullumi 28/7 nal. 17:00 aallarnerfigalugu atuutilerput.

Allannguisoqarsinnaavoq

Killilersuinerit tamarmik atuukkallartussaapput, ulloq atorunnaarfissaat ersarissumik taaneqarluni.

Kalaallit Nunaanni Coronap atuunnera oqartussaasunit ingerlaavartumik naliliiffigineqartassaaq. Pissutsit qanoq inneri apeqqutaallutik Naalakkersuisut killilersuinerit atuuttut qasukkarsinnaavaat, sukannernerulersissinnaallugit, sivikillisissinnaallugit sivitsorsinnaallugilluunniit.