Coronavirusit ilaat Delta Kalaallit Nunaannut apuussimasoq uppernarsarneqarpoq

Misiligutit tunillatsittoqarsimaneranik inernillik tamarmik Qallunaat Nunaannut nassiunneqartarput coronavirusit ilaat sorliunersoq paasiniarlugu. Maanna misissuinerit takutippaat coronavirusit ilaat Deltamik taaneqartoq Kalaallit Nunaannut apuussimasoq.

”Juulip arfernani Airbussimi Qallunaat Nunaanniit nunatsinnut tikittumi tunillaassuuttoqarnerani coronavirusit ilaat Deltasoq paasineqarpoq. Tamatuma kinguneraa Ilulissani, Sisimiuni, Nuummi kingusinnerusukkullu Kujataani nappaammik tuniluuttoqalerneranik. Ilaatigut Qaqortumi tusarnaartitsisoqarnerani tunillaassuuttoqarluni. Tuniluuttoqarnerani misissortittut tamangajammik Deltamik tunillatsissimasut paasineqarpoq, ikittunnguit qulakkeerneqarsinnaasimanngillat misiligutini tigusat misissorluarneqarnissaanut naammassimanngimmata.” Nunatta Nakorsaaneqarfianiit Paneeraq Noahsen taama nassuiaavoq. 

Nuummi Upernavimmilu tuniluunnerit ilisimaneqareersuni coronavirusit ilaat sorleq tuniluuttuunersoq pillugu akissutissat suli utaqqineqarput. 

Delta nunatsinnut apuussimaneranik uppernarsaaneq Paneeqqamut tupaallannanngilaq:” Tusagassiortunik katersortitsinerni kingullerni oqatigineqareernikuuvoq coronavirusit ilaat tuniluunnerujussuusartoq nunatsinnut apuussimasinnaanera ilimagalugu, maanna qulakkeerparput. Piffissami sivitsortumi coronavirusit ilaat Delta Qallunaat Nunaanni atugaanerpaasimavoq, tamaammat suliariaatsit suliniutillu sapaatit akunnerisa marluk matuma siorna aallartinneqartut pasitsaassinermik aallaaveqarput.”

Coronavirusit ilaat Delta nunatsinnut apuussimanerata uppernarsarneqarnerata kingorna maleruaqqusat innersuussutigineqartut tunillanneqarnissamut illersuisussat allannguuteqanngillat. Innuttaasut tamarmik allanut attaveqarpallaannginnissaat aammalu qanimut attaviit ikinnerpaaffissaaniitinnissaat kaammattuutigineqarpoq. Ilutigalugu innuttaasut ersiutit eqqumaffigissaagat aammalu innersuussutit nalinginnaasut malissagaat kaammattuutigineqarlunittaaq:

– Ersiuteqaruit tunillanneqarsimasumulluunniit attaveqarsimaguit angerlarsimagit
– Assatit asakulakkit imaluunniit assanut sprit atortuk.
– Tangajoruit quersoruilluunniit talinnik asseruk.
– Assamminnerit, ersakkut kuninnerit pakkunnerillu pinaveersaakkit – timikkut allamut attuisarneq killileruk.
– Eqqiluisaarneq eqqumaffigiuk – angerlarsimaffimmi aammali suliffinni.
– Qanillinaveersaarit allallu taamatut ilioqqullugit.