Nuummi ataaseq Covid-19-imik tunillanneqarsimavoq – timmisartumut ilaasimasut mattusimanissaannik kaammattorneqarput

Kingullermik nutarterneqarpoq

Arfininngornermi suli ataaseq Covid-19-imik tunillanneqarsimasoq paasineqarpoq. Pineqartoq Upernavimmi tuniluunnermik ilisimaneqareersumik tunillanneqarsimavoq taannalu kingorna Nuummut aallarsimavoq tunillanneqarsimanini ilisimanagu.

Taamaattumik misissortinnissaq kaammattuutigineqarpoq aallartuni ukunani ilaasuusimagaanni:
20/7-2021 GL 205 Upernavimmiit Ilulissanukartumut
21/7-2021 GL 513 Ilulissaniit Kangerlussuaq aqqusaarlugu Nuummukartumut

Timmisartuni taaneqartuni angalasimasut tamarmik angerlarsimaannarnissaannik kaammattorneqarput aamma tunillanneqarsimanermiit ullut 7-issaanni imaluunniit ullut taakku sioqqullugit ersiutaasunik malugisaqarsimagunik misissortinnissaannik.

Qanimut attavigineqarsimasut tamarmik Covid-19-imut ersiutaasinnaasunut immikkut maluginiagaqaqquneqarput, taamatullu iliussapput ullut 14-it angullugit inuk nutaamik Coronaviruseqartoq qanimut attaveqarfigisimaneraniit, aamma misissortinnermiit ullut 7-issaanni negativiusimagaluaraanni.

Upernavimmi misissuineq
Upernavimmi misissortittoqarsinnaavoq Peqqinnissaqarfimmut piffissamik inniminniinikkut uunga sianerluni 96 49 13.

Misissugassat Ilulissanut ingerlateqqinneqartussapput, taamaammat akissutisinissaq sivisunerulaarsinnaavoq. Taamaattumik mianersoqqissaarnissaq pingaartuuvoq.
Upernavimmi misissukkanit misissuinermit ersersinneqarpoq, qanimut attavigineqartut negativiusut amerlanerpaataat akiuussutissamik tunineqarsimasuusut. Upernavimmi innuttaasuni tunillatsittut kingulliit pingsuugaangata marluk akiuussutissinneqarsimasuunngillat.

Tasiusami killiffik
Tasiusami innuttaasut 148-t arfininngornermi misissorneqarput. Innuttaasunit taakkunannga arfinillit ersiuteqarsimappput, taamaattumillu PCR-imik tapertalerluni, sukkanerusumik paasissutissiisinnaasunik, misissorneqarput. Taakku tamarmik negativiupput.

Misissukkat tamarmik ippassaq unnukkut kingusissukkut Upernavimmut ingerlateqqinneqarput aamma ualeru Ilulissanut misissoqqissaarnissaannut ingerlateqqinneqassapput, Upernavimmi misissuinermut atortut naammanngimmata.

Upernavimmi Ilulissanilu sulisunut qujanarujussuaq naak aqqutaani unammilligassaqarsimagaluartoq immikkut ittumik iliuuseqarsimanerat pillugu!

Siunnersuutit angerlarsimaannarnissamilu malittarisassat
Innuttaasut tamarmik allanut attaveqarnerminnik killilersimaarinninnissaannik kaammattorneqarput, aamma qanimut attaveqarfimminnik sapinngisamik amerlavallaartitsinnginnissaannik. Peqatigitillugu kikkut tamarmik ersiutaasinnaasunik eqqumaffiginninnissaat kaammattuutigineqarpoq nalinginnaasumillu siunnersuutit eqqaamallugit:

– Ersiuteqaruit tunillanneqarsimasumulluunniit attaveqarsimaguit angerlarsimagit
– Assatit asakulakkit imaluunniit assanut sprit atortuk.
– Tangajoruit quersoruilluunniit talinnik asseruk.
– Assamminnerit, ersakkut kuninnerit pakkunnerillu pinaveersaakkit – timikkut allamut attuisarneq killileruk.
– Eqqiluisaarneq eqqumaffigiuk – angerlarsimaffimmi aammali suliffinni.
– Qanillinaveersaarit allallu taamatut ilioqqullugit.