Tunillatsisimasut marluk nutaat: Qaqortumi ataaseq aamma Upernavimmi ataaseq

Kingullermik nutarterneqarpoq

Qaqortumi tunillatsisimasoq nutaaq tunillatsereersimasumut qanillisimasuuvoq taamaammallu tuniluunneq ilisimaneqartumeerluni. Tunillatsissimasoq arfininngormalli angerlarsimaannareersimavoq maannakkullu angerlasimalluni mattusimalluni.

Tunillatsisimasoq Upernavimmeersoq ulluni arlalinni napparsimasimavoq, napparsimalinnginnerminilu ulluni juulip 13-ianiit 17-iata nalaani Upernaviup eqqaani nunaqarfimmi Tasiusamiissimalluni. Tunillatsissimasoq angerlasimalluni mattusimavoq. Tunillatsissimanera sumi pisimanersoq maannakkuugallartoq ilisimaneqanngilaq.

Peqqinnissaqarfik Upernavimmi misissuisinnaanera annertusarniarlugu maanna suliaqarput, ullunilu aggersuni innuttaasunik ersiutilinnik misissuineq aallartinneqarsinnaassalluni. Tungaanut tunillatsissimasup qanillisimasai misissorneqarnissaannut neqeroorfigineqarput. Tunillatsissimasumut qanillisimasut Corona pillugu Allatseqarfimmit attavigineqarumaarput.

Sapaatip akunnerata naanerani Upernaviup eqqaani nunaqarfimmi Tasiusami innuttaasut misissorneqarnissaannik neqeroorutigineqarumaarpoq, piffissaq sumiiffissarlu kingusinnerusukkut nalunaarutigineqarumaarpoq.

Tunillanneqarsimasumut qanillisimasut ullut arfineq-marluk angerlarsimaannassapput, ullullu arfineq-aappassaanni misissortinnikkut tunillatsissimannginnerat uppernarsarneqarnissaata tungaanut angerlasimaannartussaallutik. Tunillatsissimasut qanillisimasut ullut arfineq-marluk iluani ersiuteqalersimagunik angerlasimallutik mattusimalissapput misissortinnissarlu pillugu peqqinnissaqarfimmut sianerlutik saaffiginnissallutik.

Kikkut tamarmik qanillinaveersaarnissaat innersuussutigineqarpoq. Pisortaniillu innersuussutigineqartut soorlu qanillinaveersaarnerit eqqiluisaarnissarlu malinneqarnissaat innersuussutigineqarluni.

– Napparsimaguit angerlarsimagit.
– Assatit errortukulakkit, imaluunniit assannut spriti atoruk.
– Tallinnut quersorlutilluunniit tangajorit.
– Assamminneq, ersakkut kunissineq eqitaarinerlu pinaveersaakkit – inunnik allanik timikkut attugaqarnissat killileruk.
– Eqqiaaneq eqqumaffigiuk – angerlarsimaffinni suliffinnilu.
– Inunnut qanillinaveersaarlutillu allat innimiginninnissaannik piumaffigikkit.