Tamanut angallassissutini akiuussutissamik kapitissimanissamut piumasaqaat arfininngorneq juulip 24-anit atuukkunnaassaaq

Kingullermik nutarterneqarpoq

Tallimanngornerup unnuaani nalunaaqutaq 00.00-inngorpat arfininngornerulerluni, tamanut angallassissutinik atuinissamut akiuussusertillutik aallartitsisimanissaq piumasaqaataajunnaassaaq. Malittarisassalli allat suli atuutissapput, matumani timmisartortillutit, umiarsuartillutit, taxartillutit illoqarfimmilu bussertillutit qanermut assiaqutit suli atortassavatit.

Ullut kingulliit COVID-19-imut misissuineq annertooq isumalluarnarsimavoq, juulimmi 20-ani Nunatsinni misissuinerit tamarmik tunillatsissimasortaqanngillat. Tamanna ilutigalugu nuna tamakkerlugu tunillatsissimasut amerlassusaat ullumi 25-nut apparput, taamaattumillu malittarisassanik qasukkaaneq politikkikkut akuerineqarpoq.

Taamaattumik arfininngornermi juulip 24-anit, tamanut angallassissutinik atuissagaanni, Covid-19-imut akiuussutissamik minnerpaamik siullermeersumik kapitissimanissaq piumasaqaataajunnaassaaq.

Taamaattorli timmisartortillutit, umiarsuartillutit, taxartillutit illoqarfimmilu bussertillutit qanermik assiaqutit atortassavatit. Pisiniarfinni sumiiffinnilu kikkunnit tamanit iserfigineqarsinnaasuni qanermut assiaquteqarnissamik piumasaqaat suli aamma atuutsinneqaannassaaq, soorluttaaq inuit 20-t qaangerlugit katersuunnissaannik inerteqquteqarneq aamma atuutiinnassasoq.

Killilersuinerit tallimanngorneq juulip 30-at ilanngullugu atuukkallassapput.