Katereqqusinnginneq sivitsorneqarpoq – Sisimiuniit Qaqortumiillu angalaqqusiunnaartoqarpoq

Illoqarfinni arlalinni piffissami kingullermi tunillatsittoqarsimanerata kingunerisaanik, Naalakkersuisut marlunngormat killilersuutit atuutilersinneqartut sivitsussallugit aalajangerput. Imaappoq, suli inuit 20-t sinnerlugit katersuuttoqaqqusaanngilaq, aammalu inini tamat iserfigisinnaasaanni qanermut assiaquteqarnissaq piumasaqaataavoq.

Peqatigitillugu Tunillaassortunik Nappaalanersuaqarneranut Ataatsimiititaliarsuup aalajangerpaa, Sisimiuniit Qaqortumiillu Nunatta sinneranut angalasoqaqqusaajunnaassasoq. Inuit illoqarfinni taakkunaniittut, Danmarkiliarnissaminnut suli periarfissaqarput. Taamaaliortoqarnissaanut Narsarsuarmiit Kangerlussuarmut toqqaannartumik timmisartortitsisoqassaaq. Killilersuutit taakkua ataasinngorneq juulip ulluisa 19-iata tungaanut atuupput, immaqalu sivitsorneqarsinnaallutik, tunillatsittut qanoq amerlatigineri apeqqutaallutik.

Angalanissamik killilersuisoqarneranut peqqutaapput, maannakkorpiaq aqunneqarsinnaanngitsumik Sisimiuni Qaqortumilu tunillaassuuttoqarnera, tamannalu nunap sinneranut siaruatsaaliorniarlugu pisortanit pinngitsoortinniarneqarmat. Peqatigitillugu Qaqortumi misissortinnissamut periarfissakippoq. Tamanna Nakorsaaneqarfiup Peqqinnissaqarfiullu ulluni aggersuni iluarsiiviginiarpaat. Taamaaliortoqassaaq, sulisut misissuinermilu maskiinat Nuummiit Qaqortuliaannerisigut.

Killilersuinerit ilinnut qanoq isumaqarpat:
• Inuit 20-t sinnerlugit katerittoqaqqusaajunnaarnerat.

• Inini kikkut tamarmik iserfigisinnaasaanni, inuit isersimasinnaasut akuerisat affaannaat isersimasinnaapput. Amerlanerpaamilli inuit 20-ussapput. (Pisiniarfinnut inunnut 20-nut killilersuut atuutinngilaq)

• Inini kikkunnit tamanit iserfigineqarsinnaasuni qanermut kiinnamulluunniit assiaqutit atorneqartassapput.

• Tamanut angallassissutit issiaviit amerlassusaat malillugit taamaallaat ilaasoqarsinnaapput, tamanullu angallassissutini tamani qanermut kiinnamulluunniit assiaqutit atorneqartassapput.

• Sisimiuniikkuit Qaqortumiikkuilluunniit Kalaallit Nunaanni inoqarfinnut allanut angalassanngilatit.

Killilersuutit nutaat tallimanngornermi juulip 19-ianni unnuap qeqqata tungaanut atuukkallassapput.