Qaqortumi tusarnaartitsinermi tunillatsisimasut pingasuugallartut: 250-it misissortissapput

Tallimanngormat juulip arfineq-sisamaani Qaqortumi Rockhousemi tusarnaariarpit? Taamaappat angerlarsimaannassaatit Coronavirusimullu misissortillutit.

Tuniluunnerup paasiniarnerani inuit pingasut tunillatsissimasut tusarnaartitsinermiissimasut paasineqarpoq. Tusarnaartitsinermi inuit 250-it missaaniittut tusarnaariarsimapput.

Tusarnaartitsinermi najuussimasut angerlarsimaannarnerup misissortinnerullu saniatigut mianersorluarnissaat aammalu inoqatiminnut qanillinaveersaarnissaat kaammattuutigineqarpoq, aamma misissortinnermi tunillatsissimanngittutut inerneqarsimagaluarpat, misilittakkami takutippaat tunillatsissimasut ullut tallimassaani misissortinnermi tunillatsissimanngitsutut inerneqariarlutik kingusinnerusukkut tunillatsisimasutut inerneqalertarsimasut.

Qaqortumi misissortinniaruit mailimut qaqshv@peqqik.gl-mut allallutit inniminniissaatit. Aqqit, inuttut normut, adresset kiisalu oqarasuaatippit normua allassavatit. Peqqinnissaqarfimmiit attavigineqarumaarputit, sukkanerpaaq atorlugu misissorneqarumaarputit.