Maanna tuniluuttoqarnera aamma ulluni tulliuttuni Covid-19-imut misissortinnissamut periarfissat pillugit paasissutissiineq

Nakorsaaneq arfininngormat 10. juulimi nalunaaruteqarpoq, tunillatsissimasut nutaat sisamat nassaarineqartut. Taakkunannga pingasut 6. juli 2021-mi Kalaallit Nunaannut timmisartumut ilaaqatigiissimapput. Covid-19-imi Delta maanna atugaasorujussuaq timmisartumi tuniluunnissamut ilimanaateqartorujussuuvoq. Ippassaq inassutigaarput, KĂžbenhavnimiit ilaasunut tunillatsissimasunut qanillutik issiasut arfininngormat misissortereersimanngikkunik misissortissasut. Taamatuttaaq inassutigaarput, nunatsinni timmisartuni arlalinni ilaaqataasimasut misissortereersimanngikkunik misissorteqqullugit. Inassuteqaat taanna aamma akiuussutissanik kapitissimasunut atuuppoq.

Ataasinngorpat 12. juulimi aamma marlunngorpat 13. juulimi matuma siuliani inassuteqaateqarfigineqartunut tamanut misissortinnissamut periarfissat imatut isikkoqarput:

Nuuk:
Inuit timmisartuni il.il. tunillatsissimasinnaasut nal. 10:30-miit 12:00-imut misissortissinnaapput.
Ullut tallimassaanni misissortinnerit nalinginnaasut nalinginnaasumik 08:15-imiit 10:00-imut ammasarput.
Misissuinerit Misissuivimmi, siornatigut Kalaaliaraasimasumi, Nuup qeqqani Brugsenip eqqaaniittumi ingerlanneqartarput.

Qaqortoq:
Napparsimmavimmi misissuinissat nal. 09:00 ammassapput.
Misissuineq nunap immikkoortuata napparsimmaviani ingerlanneqassaaq.

Ilulissat:
Inuit timmisartuni il.il. tunillatsissimasinnaasut napparsimmavimmi nal. 13-imiit misissorneqarsinnaapput.
Ullut tallimassaanni misissortinnerit nalinginnaasut nalinginnaasumik 09:00-imiit ammasarput.
Misissuineq nunap immikkoortuata napparsimmaviani ingerlanneqassaaq.

Sumiiffinni allani ammarfissat pillugit najukkani peqqissaavinni saaffiginninnikkut paasiniaasoqarsinnaavoq.

Covid-19-imik ersiuteqalersut tamarmik erngerlutik oqarasuaatikkut peqqissaavimmut qaninnermut imaluunniit nunap immikkoortuani napparsimmavimmut misissortinnissamik isumaqatigiissuteqarniarlutik saaffiginneqqullugit qinnuigineqarput.
Angalasut akornanni suli paasineqanngitsunik tuniluuttoqarsimasinnaavoq. Taamaattumik kikkut tamarmik qinnuigineqarput, tuniluuttoqannginnissaa anguniarlugu ikiuuteqqullugit. Qanillinaveersaarit timikkullu attuinaveersaarit, errortorluartarit aammalu malunniuteqaruit angerlarsimaannarit.

Kalaallit Nunaanni inuppassuit akiuussutissamik kapitereeraluartut, Covid-19 inuiaqatigiinnut suli annertuumik ulorianartorsiortitsivoq. 18-ileereersimasunit utoqqaanerusunillu 10.000-it sinnerlugit suli akiuussutissamik siullermeerlutik kapitissimanngillat, naak kikkut tamarmik maanna neqeroorfigineqareersimagaluartut.

Nuummi tuniluuffiunerpaasussami innuttaasunit 3.500-t sinnerlugit akiuussutissamik kapitinnissamut neqeroorummik atuisimanngillat. Akiuussutissamik kapitissimasut affaasa missaat marloriarlutik kapitereerput.

Pingaartumik inuusunnerusut suli kapitissimanngillat. Akiuussutissanik kapitissimasunit 18-24-nik ukiullit ikinnerpaapput, kisiannili ukioqatigiiaat tamaasa isigalugit 45-t inorlugit ukiullit akornanni kapitissimasut ikipput. Aamma utoqqaat akornanni arlallit suli kapitissimanngillat. Ukioqatigiiaani inuusunnerusuni kapitittoqartarpat aatsaat annertunerusumik tuniluuttoqarnissaa pinngitsoorneqarsinnaavoq.

Kalaallit Nunaanni akiuussutissanik kapuineq pillugu kikkut tamarmik tapersersuinissaat inassutigineqarpoq. Juulip qaammataata ingerlanerani kapitinnissamut periarfissiisoqaqqissaaq. Nittartakkami uani malinnaagit.