Nunatsinni umiarsuit sinersorlutik takornariartitsisartunut ammaasilerpoq

Kingullermik nutarterneqarpoq

Corona pillugu killilersuutit ilaat ataaseq atorunnaalerpoq. Marsip ulluisa aappaanniit inuit akiuussusersuinermik naammassinnissimasut imaluunniit nunatsinni najugallit Kalaallit Nunaannut umiarsuarmut ilaaqqissinnaalissapput. Maannamut umiarsuit ilaasartaatit taamaallaat ulluni kingullerni 14-ini imaaniissimagunik, aammalu nunanut allanut, Savalimmiunut, Danmarkimulluunniit umiarsualivimmut talissimanngikkunik, imaluunniit taakkunanngaanniit ilaasunik ikisaqarsimanngikkunik nunatsinnut tikissinnaagaluarput. Umiarsuilli aalisariutit akiuussuserneqarsimanermut uppernarsaateqarnissamut piumasaqaatinut ilaatinneqanngillat.

Naalakkersuisut ilaasunik maannangaaq angallassinermik ammaassinermikkut ukioq manna umiarsuit sinersorlutik takornariartitsisarnerisa Corona pillugu killilersuutinit sunnerneqannginnissaa qulakkeerniarpaat. Maleruagassat nutaat atuutilernerisigut inuit Kalaallit Nunaanni najugaqanngitsut nunatsinnut tikinnginnerminni akiuussusersuinermi naammassinnissimanissaat kisimi killilersuutaalerpoq. Killilersuut taanna maannamuugallartoq 2. juuni 2022-p tungaanut atuutissaaq.

”Naalakkersuisuniit corona pillugu killilersuutit qasukkaamiallatseqqissinnaaleratsigit nuannaarutigisorujussuuarput. Taamatut qasukkaaneq nunatsinni takornariaqarnermut isumaqartorujussuuvoq, maanna umiarsuit sinersorlutik takornariartitsisartut nunatsinnut tikeqqissinnaalerlutik ammaanneqartussanngormata. Aamma tamatuma kingunerisaanik nunatsinni takornariartitsisarnermik inuussutissarsiuteqartut nunanit allaniit takornarianik tikisitsinissamut pilersaarusiorsinnaalerput.” Niuernermut Inuussutissarsiornermullu Naalakkersuisoq Pele Broberg oqarpoq.

”Inuiaqatigiinni pissutsit nalinginnaasut qanilleqqissinnaaleratsigit nuannaarpunga, kisiannili tikittussat, nunatsinni najugaqanngitsut akiuussuserneqarsimanissaannut piumasaqaat atuutsiinnarneqassasoq aalajangerpugut. Naalakkersuisut aalajangerput, killilersuinerni qasukkaaffissap kingulliup atuutsinneqalernissaata isumannarunnaarneranik peqqissutsimik suliallit naliliinissaasa tungaanut akiuussuserneqarsimanissamut piumasaqaat sivitsorneqassasoq”, Kirsten L. Fencker oqarpoq. Naggasiutigalugu Kirsten L. Fencker ilisimatitsivoq, ”Erseqqissaatigissavara, killilersuutinik atorunnaarsitsisarnerput coronap nunarsuarmi tuniluunnerata qaangiunneranik isumaqanngimmat. Suli tuniluuttoqarpoq, aammalu ineriartorneq suli nakkutigaarput, pisariaqalissappallu killilersuinernik atuutsitseqqilernissamut piareersimavugut”.

Paasisaqarnerorusukkuit naalakkersuisoqarfimmi pisortaaq Nike Berthelsen, e-mail nike@nanoq.gl  imaluunniit oqarasuaat +299 34 66 90 attavigiuk.