Nalunaarut sivitsorneqarpoq: Nuna tamakkerlugu killilersuinerit
Kingullermik nutarterneqarpoqIlloqarfiit nunaqarfiillu ilaanni killilersuutaagallartut pillugit Namminersorlutik Oqartussat nalunaarutaat nuna tamakkerlugu atuuttussanngorlugu allanngortinneqarpoq, aammalu 14. februaari 2022 ilanngullugu atuuttussanngorluni.Nalunaarut aqagu pingasunngornermi 26. januaarimiit nuna tamakkerlugu atuuttussanngorlugu allanngortinneqarpoq, aammalu maannamuugallartoq 14. februaari 2022 ilanngullugu atuuttussanngortinneqarluni.
Kalaallit Nunaat tamakkerlugu killilersuinerit
Nalunaarut nuna tamakkerlugu atuuttussanngormat sumiiffinni tuniluuffiusutut taasani suleriaatsit peerneqassapput.
Akiuussuserneqarsimanermut uppernarsaat
Ininut tamanit iserfigineqarsinnaasunut isersinnaasut sukannernerulersinneqassapput, taamaalillunilu inuit 15-it inorlugit ukiullit, kiisalu inuit akiuussusersuinermi naammassinnissimasut kisimik isersinnaalissapput.
Taamaattumik 15-inik ukiullit utoqqaanerusullu akiuussuserneqarsimanngitsut inimi sulisussaanngikkunik ininut taakkununnga isernissamut itigartinneqartalissapput.
Killilersuineq taanna suli ulluinnarni atugassanut niuertarfinnut, allakkerivinnut, mittarfinnut, ininut kiffartuussiviusunut, pisortani oqartussaasut suliffeqarfiillu pilersuisuusut saaffiginnittarfiinut il.il., kiisalu tamanik assartuussissutinut atatillugu utaqqisarfinnut atuutsinneqassanngilaq.
Tassalu inuit akiuussuserneqarsimanngitsut sapaatit akunnerini marlussunni tulliuttuni soorlu neriniartarfinnut, imerniartarfinnut filmertarfinnullu isernissamut itigartinneqartassapput.
Qanermut assiaqut eqqaamallugu
Nalunaarut nuna tamakkerlugu atuutilertussaammat maluginiassallugu pingaaruteqarpoq, inini tamanit iserfigineqarsinnaasuni, kiisalu tamanik assartuussissutini qanermut kiinnamulluunniit assiaqummik atuinissaq piumasaqaataammat.
Inuit inini isersimasinnaasut amerlanerpaaffissaat
Tamatuma saniatigut maleruagassat atuutilernerisigut ininut tamanit iserfigineqarsinnaasunut isersinnaasut amerlassusissaat killilerneqassapput. Tassalu inuit inimi isersimasinnaasutut ikuallattoornissamut oqartussaasunit akuerineqartut amerlanerpaamik affaat isersimasinnaapput.