Misissuisarnermi periusissiaq nutaaq: Napparsimaguit angerlarsimaannarit
Kingullermik nutarterneqarpoqKalaallit Nunaanni misissuisarnermi periusissiaq nutaaq paatsuunganartippiuk? Taanna aatsaat taama paasiuminartigaaq. Siornatigut ersiuteqaleruit imaluunniit qanillisaqarsimaguit misissortittussaagaluarputit, maannali eqqaamasassat ataasiinnaavoq; tassalu napparsimaguit angerlarsimaannarit.
”Maannarpiaq tuniluunneq ima sukkatigisumik ingerlammat, napparsimalernermi Coronarsimanissaq ilimanaateqartorujussuuvoq. Taamaattumik ersiutillit tamarmik Coronartutuut pissusilersortussaapput. Aaqqinnissamik tungaanut angerlarsimaannassapput avatangiisiminnullu qanillinaveersaassallutik”, nakorsaaneq Henrik L. Hansen oqarpoq.
”Ukiuni marlunni kingullerni Kalaallit Nunaanni tuniluuttoqannginnissaa anguniagarisimagaluarparput. Tamanna pissappat tunillatsissimasut tamarmik mattunnissaat pingaaruteqarsimavoq, taamaattumillu ersiuteqalersut tamarmik aammalu tunillatsissimasumut qanillisimasut tamarmik misissorneqartarput. Maanna tuniluunneq ima annertutigilersimavoq, unitsinnissaa ajornarsisimalluni. Taamaattumik inuit tusintilippassuit misissortarnissaat isumaaruppoq sulissutigineqarnissaalu ajornarsilluni. Tamatumani ilisimariikkatsinnik oqaluttuunneqartussaavugut, tassalu tuniluunneq siaruaatsingaatsiareerpoq”, Henrik L. Hansen oqarpoq.
Misissortissinnaanerup ingerlaannarnissaa innuttaasunit amerlasuunit kissaatigineqartaraluarpoq, kisiannili maannarpiaq inuit sapinngisamik amerlanerpaat misissortarlugit ingerlatiinnarnissaa naapertuutinngilaq.
”Inuppassuit Coronamik tunillatsissimanerlutik paaserusuppassuk paasisinnaalluarpara, kisiannili tamanna sulissutigineqarsinnaanngilaq, aammalu peqqinnissaqarfiup isumalluutini napparsimasut katsorsarneqarnissaannut qulakkeeriniarnermut akiuussusersuinermullu atortussaavai. Misissortinnermi aaqqittoqarsinnaanngilaq, kisiannili peqqinnissaqarfimmi sulisut ullormut inunnik 1.000-it sinnerlugit misissuisarnissamut pisariaqartinneqartut Peqqinnissaqarfiup iluani sumiiffinni allani atorfissaqartinneqartorujussuusinnaapput. Coronamik tunillatsissimanerluni paaserusukkaanni angerlarsimaffimmi misissuut atorlugu misissuisoqarsinnaavoq”, Henrik L. Hansen oqarpoq.
Maannarpiaq nunatsinni COVID-19-imut misissortinnissamut pisariaqartitsisut immikkoortut marluinnaapput. Tassaapput inuit napparsimarujussualernissamut ulorianartorsiortut aamma meeqqat 12-it inorlugit ukiullit, Kalaallit Nunaata iluani angalasussat.
Boosterimik kapitissimanngikkaanni maleruagassat pisariunerulaalissapput. Boosterimik kapitissimanngikkaanni aammalu tunillatsissimasumut qanillisimagaanni ulluni arfineq marlunni angerlarsimasarnissaq atuutilerpoq. Sapaatit akunnerisa 12-it kingulliit iluanni tunillatsissimagaanni, pingajussaannik kapitissimanertut isigineqalertarpoq.