Omikron nunatsinni pingajussaannik kapuinissamut siuartitsivoq

Kingullermik nutarterneqarpoq

Coronap allanngortua nutaaq Omikron nunarsuatsinni sukkasuumik siaruariartorpoq. Allanngortumit Delta-mit tuniluutianerujussuuvoq, ilimanarporlu qanittukkut akiuussuserneqarsimanngitsunut saneqqutaarisinnaasoq. Aamma Omikron-p qanittukkut Kalaallit Nunaannut pinissaa naatsorsuutigineqartariaqarpoq, taamaattumillu oqartussaasut pinngitsoorneqarsinnaanngitsumut piareersarlutik aallartipput.

”Omikron Kalaallit Nunaannut pissanersoq apeqqutaajunnaarpoq. Allanngortoq nutaaq taanna apuukkumaarpoq, tamannallu sapaatit akunnialunnguit ingerlanerini pissarsiariumaarparput. Taamaattumik akiuussusersuinerput naleqqussartariaqarparput, aammalu 40-leereersimasut tamaasa pingajussaannik kapitinnissamut neqeroorfiginissaat aallutilissavarput, taakku napparsimalernerminni perulunnerpaajusussaammata”, nakorsaaneq Henrik L. Hansen oqarpoq.

Ippassaq danskit peqqissutsimut aqutsisoqarfianniit nalunaarutigineqarpoq, 40-leereersimasut kingullermik kapitinnerminniit qaammatit sisamat affallu qaangiunnerini pingajussaannik kapitinnissaat inassutigineqartoq, maannatut qaammatit arfinillit sapaatillu akunneri marluk atorneqarani. Taamatut inassuteqarnermut tunngaviuvoq, misissuinerni paasineqarmat akiuussutissat sunniutaat piffissap ingerlanerani sakkukilliartortartut, kisiannili pingajussaannik kapitinnermi Omikron-imik tunillatsinnerup kingunerisaanik napparsimarululernissamut illersuutissaqartoqarnissaa naatsorsuutigineqarpoq. Nakorsaaneqarfimmiit Naalakkersuisunut inassutigineqarpoq, Kalaallit Nunaanni maleruagassat taakku atuutsinneqalissasut, tamatumunngalu Naalakkersuisut akuersipput.

Ulluni tulliuttuni Nakorsaaneqarfimmiit nunap immikkoortuini peqqinnissaqarfinni ataasiakkaani qaqugu akiuussusersuinissamut periarfissaqartoqarnersoq nalunaarutigineqassaaq. Maannakkumut pilersaarutit inissinneqareersut ima isikkoqarput.

“Sapaatip akunnerani uani pingasunngornermiit tallimanngornerup tungaanut Sisimiuni pingajussaanik akiuussusersuisoqassaaq. Akiuussusersorneqartussat tamarmik SMS-ikkut imaluunniit oqarasuaatikkut attavigineqarumaarput, kiisalu Nuummi sapaatip akunnerata tulliani ataasinngornermi marlunngornermilu nal. 09.00 – 17.00 Inussivimmi pingajussaanik akiuussusersuisoqassalluni.