Meeqqanut marlunniit arfinilinnut ukiulinnut akiuussutissinneqarnissamik neqeroortoqarsinnaalerpoq

Kingullermik nutarterneqarpoq

Inuit tamarmik nuallulersinnaapput – aamma meeqqat.

Ukiornerani nutaarsiassatut meeqqat marlunniit arfinillit ilanngullugit ukiullit nualluummut akiuussutissinneqarnissamik neqeroorfigineqarsinnaalerput.

Nualluummut akiuussutissaq immikkut ittumik ineriartortitaavoq aammalu meeqqanut atugassatut akuerisaalluni. Sorlukkut seqqittagaavoq, sorluit illuttut seqqinneqartarlutik, taamaalillutillu meeqqat kapitittariaqanngillat.

Peqqinnissamut oqartussaasut inassutigaat, meeqqat akiuussutissinneqarnissaannut neqeroorut akuerineqassasoq, taamaalillunilu meeqqat, ilaqutariit inuiaqatigiillu sinnerini tuniluuttoqarnissaa pinaveersaarneqassasoq.

Sooq meeqqat marlunniit arfinilinnut ukiullit nualluummut akiuussutissinneqarnissaat inassutigineqarpa?

Ilaqutariinnut meerartalinnut isumaa

Nualluummut akiuussutissiinermi siullertut pingaarnertullu meeqqat taamatut ukiullit ilaqutaallu tuniluuttoqarnissaanut illersorneqassapput.

Nualluut virusiuvoq tuniluuttoq, anersaartorfinnut eqquisartoq. Meeqqat marlunniit arfinilinnut ukiullit nuallulersut amerlanersaat sakkukitsumik peruluffiunngitsumillu napparsimasarput – kisiannili meeqqanit tunillatsissimasunit ikittunnguit anersaartorfitsigut ajornartorsiuteqalersinnaapput, soorlu anersaartorfitsigut aseruuttoorsinnaapput astmaqarnerminniluunniit ajornerulersinnaallutik.

Pingaartumik meeqqat mikisut nualluummik napparsimangaatsialersinnaapput, taamaattumillu assersuutigalugu meeqqat qatanngutiminnut nukarlernut tunillaassuinissaasa pinaveersaartinnissaa naapertuutissaaq.

Ilaqutariinni meerartalinni ataasiakkaani meeqqanik akiuussutissiineq napparsimasoqaqqinnissaa pinaveersaartinneqarsinnaavoq, aammalu suliartunngitsoornerit, angerlartitsinerit, mattusimanerit ullullu napparsimaffiusut, ulluinnarni ilaqutariit inuunerannut toqqissisimanerannullu sunniuteqarsinnaasut ikilisinneqarsinnaallutik.

Inuiaqatigiinnut isumaa

Meeqqat marlunniit arfinilinnut ukiullit akiuussutissinneqarnissaat nualluutip virusiata innuttaasunut tamanut siaruaannissaanut pinaveersaartitseqataasinnaavoq. Tassami meeqqat inersimasunut naleqqiullutik akulikinnerusumik nualluummik eqqorneqartarput. Aamma meeqqat inersimasunut sanilliullutik akulikinnerusumik sivisunerusumillu virusimik katagaasarput, taamaalillutillu amerlanerusunut tunillaasarlutik.

Aamma meeqqat ullup ingerlanerani attaveqarfigisaat amerlanerusarput, attaveqarfigisaallu tunillatsissinnaapput tuniluunnerlu inuiaqatigiinnut ingerlateqqissinnaallugu.

Meeqqat marlunniit arfinilinnut ukiullit akornanni nualluummik pinaveersaartitsinitsinni nualluutip tuniluutingaatsiarsinnaanera annikillisissinnaavarput. Pingaartumik ukioq manna, aamma COVID-19-imik sorsugassaqarfigisatsinni peqqinnissaqarfiup artukkerneqarnissaa pinaveersaartussaagatsigu, aammalu inuiaqatigiinni sanngiinnerit napparsimarululersinnaasut illersortussaagatsigit tamanna pingaaruteqartorujussuuvoq.

Nualluut inuppassuarnut, aammattaaq COVID-19-imik tunillatsinnerminni napparsimarululernissamut ilimanaateqarnerpaasunut ulorianartorsiortitsisuuvoq. Inuit taakku nappaatinit marluusunit taakkunannga ataatsikkut tunillanneqarunik napparsimarululersinnaapput.

Meeqqat akiuussutissinneqarnissaat pillugu

Nualluummut akiuussutissaq, meeqqanut immikkut ineriartortitaasoq akuerisaasorlu sorlukkut seqqittagaavoq, sorluit illuttut seqqinneqartarlutik. Pitsaanerpaamik illersorneqarnissaq anguniarlugu marloriarluni akiuussutissiisoqartussaavoq, sivikinnerpaamik sapaatit akunnerinik sisamanik akuttussusilinnik.

Akiuussutissami virusit uumasuupput nukillaartitat. Akiuussutissaq virusip pujoralaasaanik ilivitsunik, nualluutit aallaaviinit sisamaneersunik, inunni peqqissuni napparsimatitsisinnaajunnaarsitaasunik akoqarpoq.

Kalaallit Nunaanni peqqinnissamut oqartussaasut inassutigaat, meeqqat marlunniit arfinilinnut nualluummut akiuussutissinneqarnissaannut neqeroorut akeqanngitsoq akuerineqassasoq. Aamma Danmarkimi Peqqissutsimut Aqutsisoqarfiup tamanna inassutigaa. Nunat arlallit (ilaatigut Finlandip, USA-p, Englandip, Australiap aamma Canadap) ukiut arlallit ingerlanerini meeqqat akiuussutissinneqarnissaat inassutigisarsimavaat neqeroorutigisarsimallugulu, aammalu meeqqat akiuussutissinneqartarnerisa kingunerisaanik nualluutip tuniluunnera annikinnerusartoq paasisimallugu.

Kingunerluutit

Sorlukkut seqqittaat atorlugu nualluummut akiuussutissinneqarnermi kingunerluutaasartut amerlanerpaat sakkukitsumik sivikitsumillu atuuttarput. Kingunerluuteqarnermi sorluit milinngasinnaapput kakkiliortoqarsinnaallunilu, kissarneqartoqarsinnaavoq, nukilerisoqarsinnaavoq nerilaannerusoqarsinnaallunilu. Sakkortuunik kingunerluuteqarsinnaaneq, soorlu sapigaqarnermi, annikitsuaraavoq meeqqanullu akiuussutissat allat kingunerluutigisinnaasaat annertoqatigalugit.

Sapigaqarnermut takussutissat

Meeqqat soorlu annertuumik sapigallit, timaasa illersuuteqarnerat annikingaatsiartut imaluunniit astmaqangaatsiartut akiuussutissinneqassanngillat. Qitornavit akiuussutissaq sapinnginneraa nalorniguit nakorsamik naliliititsisinnaavutit.