Nuummi kiisalu Upernavimmi nunaqarfiinilu killilersuinerit nutaat

Malugiuk. Decembarip pingajuani ilanngussaq: Nalunaarut nutaaq decembarip aappaani 2021 atuutilersoq malillugu, najoqqutassat ataani allattorneqartut Qasigiannguani (Kommune Qeqertalik) aamma atuupput. Uani atuarnerugut

Nalunaarut sapaammi novembarip 21-ani nal. 08.00 atuutilissaaq.

Nuummi Upernavimmilu Coronap tuniluunnera killilersimaarniarlugu, tamatumalu peqatigisaanik illoqarfinni ulluinnaat ataqatigiiginnarnissaat qulakkeerniarlugu Naalakkersuisut partiit siulittaasui suleqatigalugit illoqarfinnut killilersuutinik nutaanik suliaqarput. Killilersuutit taakku maannamuugallartoq 5. decembari 2021 ilanngullugu atuutissapput.

Nuup Upernaviullu saniatigut Avannaata Kommuniani nunaqarfiit maleruagassanut ilaatinneqalerput:

1)  Tasiusaq.

2)  Upernavik Kujalleq.
3)  Nutaarmiut.
4)  Nuussuaq.
5)  Innaarsuit.
6)  Naajaat.
7)  Aappilattoq.
8)  Kangersuatsiaq.
9)  Kullorsuaq.

Maleruagassat nutaat atuutilernerisigut Sisimiuni immikkut ittumik killilersuinerit atorunnaarsinneqarput, maanna Covid-19 tassani aqunneqarsinnaalermat.

Akiuussutissinneqarsimasunut qasukkaanerit

Nuummi katersuunnissamut inuit 20-nut amerlanerpaaffilerneqarneri atorunnaarpoq. Kisianni Nuummi Upernavimmilu sumiiffinnut tamanit orninneqarsinnaasunut isernissamut akiuussutissinneqarsimanermut uppernarsaammik takutitsisoqartassaaq, soorlu ukununnga:

  • Neriniartarfiit, kaffisorniartarfiit, imerniartarfiit, diskotekit taakkulu silataat.
  • Kulturikkut sullissiviit, soorlu atuakkanik atorniartarfiit, kulturip illorsui, katersugaasiviit saqqummersitsisarfiillu.
  • Innuttaasut illui katersortarfiillu.
  • Illup iluani silamilu timersortarfiit, soorlu init timersortarfiit aamma inersuit timersortarfiit, naluttarfiit, timigissartarfiit arsartarfiillu.
  • Nujalerisut, tagiartuisartut, pinnersaasarfiit assigisaallu.
  • Pisiniarfiit ulluinnarni atugassanik tuniniagaqanngitsut.

Atuartuniit inuiaqatigiit sinnerinut tuniluuttoqarnissaa pinngitsoorniarlugu inerteqquteqarneq tamanna inunnut akiuussutissinneqarsimanngitsunut, marluk sinnerlugit ukiulinnut tamanut atuuppoq. Tassalu meeqqat marluk aamma 12-it akornani ukiullit Covid-19-imik tunillatsereersimanngikkunik, aammalu PCR-imut misissortinnermi tunillatsissimanermut uppernarsaammik, sivikinnerpaamik  ullunik 14-inik sivisunerpaamillu sapaatit akunnerinik 12-inik pisoqaassusilimmik takutitsitsisinnaanngikkunik iseqqusaanngillat.

Sumiiffinnut taakkununnga isissagaanni tamakkiisumik kapitissimasariaqarpoq, imaluunniit ilaatinneqannginnermut aalajangersakkanut immikkut ittunut ilaasoqartariaqarluni. Tamakkiisumik akiuussutissinneqarsimanissamut piumasaqaatinut ilaanngitsut ilaatigut tassaapput, inimi isersimaffigisami atorfillit suliassaminnik isumaginnittussat. Taakkuli Coronamut misissortinnermi tunillatsissimannginnermut uppernarsaamik, sivisunerpaamik nal. ak. 48-nik pisoqaassuseqartumik pigisaqassapput.

Uku tamarmik iserfigineqarnissaannut tamakkiisumik akiuussutissinneqarsimanissamik piumasaqaateqarfigineqanngillat

  • Ulluinnarni atugassanik pisiniarfiit.
  • Allakkeriviit.
  • Mittarfiit.
  • Pisortani oqartussaasut suliffeqarfiillu pilersuisuusut saaffiginnittarfii.
  • Assartuutinut tamanit atorneqarsinnaasunut utaqqisarfiit.

Nuummiit imaluunniit Upernavimmiit nunaqarfiiniillu allarnissamut piumasaqaatit

Nuummiit imaluunniit Upernavimmiit Kalaallit Nunaanni sumiiffimmut allamut aallassagaanni, tunngaviusumik tamakkiisumik akiuussutissinneqarsimanissaq piumasarineqarpoq. PCR-imik misissortinnermi tunillatsissimannginnerup uppernarsarneqarnissaa naammanngilaq.

Taamaakkaluartoq inuit uku akiuussutissinneqarsimanissamut piumasaqaammut ilaatinneqanngillat, kisiannili Nuummiit imaluunniit Upernavimmiit nunaqarfiiniillu Kalaallit Nunaanni sumiiffinnut allanut aallarnissaq sioqqullugu PCR-imik misissortinnermi tunillatsissimannginnermut uppernarsaammik takutitsisussaapput. PCR-imik misissortinneq sivisunerpaamik piffissaq aallarfissaq sioqqullugu nal. ak. 48-nik pisoqaassuseqartussaavoq.

  • Assartuutini sulisut.
  • Meeqqat marluk aamma 11-t akornanni ukiullit.
  • Inuit angerlarsimaffimminnut apuunniarlutik angalasut.
  • Inuit innuttaasunit suliakkerneqarlutik aallarnissamik pisariaqartitsisut.
  • Inuit Covid-19-imut akiuussutissinneqarnissamut Nakorsaaneqarfimmit innersuunneqanngitsut.
  • Inuit nunatsinniit aallarniarlutik Nuummiit aallartut, tamanna nunatta killeqarfiisa iluanni pisariaqanngitsumik uninnganissamik nassataqanngippat.

Nuummiit aallartussanut ilassutit

Meeqqat marluk inorlugit ukiullit Nuummiit aallarniarunik PCR-imik misissortinnermi tunillatsissimannginnermut uppernarsaateqarnissamut piumasaqaammut ilaatinneqanngillat.

Assartuutinik piginnittut maleruagassat malinneqarnissaat akisussaaffigaat.

Akiuussutissinneqarsimanissamut neqeroorut

Nuummi Inussivimmi ataasinngorneq – tallimanngorneq nal. 10.00 – 13.00 aamma Dronning Ingridip Peqqissaaviani ataasinngorneq – sisamanngorneq nal. 16.00 – 17.00 akiuussutissamik kapitittoqarsinnaavoq. Piffissamik inniminniinissaq pisariaqanngilaq.

Qanermut assiaquteqarnissamut piumasaqaat

Inini tamanit iserfigineqarsinnaasuni aamma assartuutini tamanit ilaaffigineqarsinnaasuni tamani qanermut kiinnamulluunniit assiaquteqartoqassaaq.

Qaqugukkut tamakkiisumik akiuussutissinneqarsimasarpa?

Inuk Covid-19-imut akiuussusersuinermi naammassinninnermini aammalu tamatumunnga uppernarsaasinnaalernermini erngerluni tamakkiisumik akiuussutissinneqarsimasutut isigineqalertarpoq. Uppernarsaat tassaasinnaavoq Coronapas, Min Sundhed-app, pappiaqqat kapitinnermi tunniunneqartut imaluunniit peqqissaavimmiit akiuussutissinneqarsimanermut uppernarsaat.

Inunnut siornatigut Covid-19-imik tunillatsissimasunut

Inuit siornatigut tunillatsissimasut, misissortinnerminni Covid-19-imik tunillatsissimanermut uppernarsaammik takutitsisinnaasut, PCR-imik misissortissimasut, aammalu piffissamit atuiffiusumit sivikinnerpaamik ullut 14-it sivisunerpaamillu sapaatit akunneri 12-it ingerlareersimappata, tamakkiisumik akiuussutissinneqarsimasunut maleruagassat malinnittussaapput.

Nalunaarut ukununnga atuutinngilaq:

  • Kalaallit Nunaanni Peqqinnissaqarfik imaluunniit nakorsiartarfiit, sulliviit namminersorfiusut peqatigiiffiillu, peqqissutsimik suliaqarnissamut akuersissutinik pigisaqartunit ingerlanneqartut atorfeqarfigineqartulluunniit.
  • Katersuunnerit- politikkikkut allatigulluunniit isummersornissamik siunertaqarfiusut.
  • Politiit suliassaminnik isumaginninnerini.
  • Namminersortut pisortallu ulluunerani neqeroorutaannut, atuarfinnut, ilinniarfinnut il. il., nappaatit tuniluuttut pillugit Inatsisartut peqqussutaanni § 22 naapertorlugu. 
  • Namminerisamik angerlarsimaffinni aaqqissuussinerit il.il.