Ataasinngornermi tunillatsissimasut 40-t – amerlanerpaat Nuummiillutik. Pissutsit ajornakusoorput

Kalaallit Nunaanni 40-t nutaat tunillatsinnerini ullup unnuallu ingerlanerani Coronamik tunillatsittut aatsaat taama amerlatigipput.

Tunillatsissimasut amerlanersaat sapaatit akunneranni kingullermi Nuuk Internationale Friskole-mi tuniluuttoqalernerani tunillatsissimapput, tassanilu meeqqat qulingiluat ilinniartitsisorlu ataaseq tunillatsissimapput. Atuarfimmi tuniluunneq ima annertusitigaaq, 1.-imiit 6. klassimut atuartut tamarmik sapaatit akunnerannik angerlarsimanissaat Nakorsaaneqarfimmit inassutigineqarluni.

Ippassaq misissuinermi takutinneqarpoq suli meeqqat akornanni tuniluuttoqartoq, kisiannili tuniluunneq inuiaqatigiit sinnerinut siaruariartortoq. Tassalu ippassaq misissortittunit meeqqat 12-it inorlugit ukiullit 24-t tunillatsissimapput. Inuit ataasiakkaat 12-it aamma 18-it akornanni ukioqarput, kiisalu 16-it 18-inik ukioqarlutik. Tunillatsissimasunit inersimasut agguaqatigiissillugit 39-nik ukioqarput.

Tunillatsissimasut amerlammata maannarpiaq tunillatsissimasunik ujarlertut malinnaaniapiloorput. Taamaattumik marlunngormat ullaap tungaani tunillatsissimasunit attaveqarfigineqartut tunillatsissimasunik ujarlertunit tamakkerneqarsimanngillat, taamaattumillu inuit kikkut qanillisimasutut misissorteqquneqarnissaat ajornakusoorpoq.

Maannarpiaq tuniluunneq unitsinneqarsimanngimmat Nuummiittut tamarmik kaammattorneqarput:

  • Inunnut allanut qanillinaveersaarnissamik aamma pakkussinaveersaarnissamut assamiinaveersaarnissamullu
  • Errortukulanissamut assannullu sprit-imik atuinissamut
  • Katersuuttunut palligunnaveersaarnissamut

Ippassaq Nuummi tunillatsittut ilanngullugit ulluni arfineq marlunni kingullerni innuttaasut 100.000-iugaangata 550-it missaat tunillatsissimasutut naliliiffigineqarput. Tamanna aamma Tårnby-mi, maannarpiaq danskit kommuniini tuniluuffiunerpaasumi atuuppoq.