Qaammatit arfinillit matuma siorna Pfizerimik akiuussuserneqarpit: Taava pingajussaanik kapitinnissannut piffissanngorpoq

Maajip aallaaqaataa sioqqullugu Pfizer/BioNTechimik COVID-19-imut tamakkiisumik akiuussuserneqarsimaguit, taava pingajussaanik – boostervaccinemik – taaneqartumik kapitinnissat piffissanngorpoq.

EU-kommisionip innersuussutai nunatta nakorsaaneqarfianiit malinneqarnissaannik Naalakkersuisunut siunnersuutigereeraa, maanna aalajangerneqarpoq nunatsinni innuttaasut 65-inik amerlanerusunik ukiullit, innuttaasut COVID-19-imik immikkut eqqugaanissamut aarlerinartorsiortut kiisalu peqqinnissaqarfimmi sulisut aammalu utoqqarnut sullissisartut Pfizer/BioNTechimik pingajussaanik kapitinnissaannut neqeroorfigineqassasut. Taaneqartut tamarmik ukiup affaa qaangiummat akiuussuserneqarnissamik neqeroorfigineqarput.

Sineriak tamakkerlugu utoqqaat illuanni akiuussusersuinissaq aaqqissuunneqarumaarpoq. Akiuussuserneqartussat allat napparsimavinni, peqqissaavinni aamma nunaqarfinnut tikeraarnermi ingerlanneqarumaarput. Najugarisami qanoq aaqqissuussisoqassanersut nalunaarutigineqarumaarpoq. Aamma corona.nun.gl-ikkut sumi qaqugukkullu akiuussusersuisoqassanersoq nalunaarutigineqarumaarpoq.

Pfizer/BioNTech atorlugu nunani allani akiuussuserneqarsimaguit, taavalu tamakkiisumik akiuussuserneqareerninniit qaammatit arfinillit ingerlareersimappata, taava najukkanni akiuussusersuisoqartillugu Nunatta Peqqinnissaqarfianut saaffiginnissaatit.

Nualluummut akiuussutissaq

COVID-19-imut akiuussummik pingajussaanik kapitinnissamut neqerooruteqartoqarnera ilutigalugu nualluummut akiuussutissamik kapitinnissamut neqerooruteqartoqassaaq. Nualluummut akiuussutissaq ukioq manna immikkut pisariaqartutut nalilerneqarpoq, tamanna ukiup kingullip coronartoqarnerani killilersuisoqarnerani nualluut tuniluutinngitsoornerata kinguneqarpoq, taamaasilluni innuttaasut nualluummut akiuussinnaassusaat sakkukillisimalluni. Qaammatini aggersuni nualluummut akiuussuserneqarnissamik neqeroorfigineqartussat ukuupput:

  1. 65-it sinnerlugit ukiullit utoqqaanerillu
  2. Naartusut 2. aamma 3. trinmesterimut killittut
  3. Anigorneqarsinnaanngitsumik nappaatillit
  4. Peqqissaanermik, inunnik isumaginnittut kiisalu utoqqarnik sullissisut, innuttaasunik attaveqartut.
  5. Meeqqat marlunniit arfinilinnut ukiullit (Akiuussutissaq immikkuullarissoq)

Anigorneqarsinnaanngitsumik nappaatillit pineqartut tassaapput inuit anigorneqarsinnaanngitsumik puamikkut, uummatimikkut taqqakkullu nappaateqartut (aap naqitsinerata appasipallaarneranik nappaatillit minillugit), sukkortut, inunnguuseralugu timikkut akiuussutissakittut imaluunniit kingusinnerusukkut pissarsiarisimasamik timikkut akiuussutissakillisimasut, nukilaassimanerup kinguneranik anerniluttut, anigorneqarsinnaanngitsumik tingukkut tartukkullu nappaatillit kiisalu nappaatit allat anigorneqarsinnaanngitsunik nappaatillit nuffasertillutik aarlerinartorsiulernissamik navianartorsiutut. Anigorneqarsinnaanngitsumik nappaatillit amerlanerpaartaat 2021-mi upernaakkut COVID-19-imut akiuussuserneqarnissamik neqeroorfigineqarput.

Meeqqat marlunniit arfinilinnut ukiullit akiuussuserneqarnissaanut immikkut ittumik paasissutissiissuteqartoqarumaarpoq. Sumiiffinni amerlanerni meeqqanut akiuussusersuinissat inersimasunik akiuussusersuinerup nalaani pissanngillat.

Inuit amerlasuut ukiup aallartinnerani akiuussuserneqarsimapput, naak eqimattat akiuussuserniakkanut ilaanngikkaluartut, tamanna akiuussutissanik asuliinnartitsinissaq pinngitsoortinniarlugu akiuussuserneqarput. Taakku aamma pingajussaanik akiuussuserneqarnissaanut neqeroorfigineqarput, taamaattorli nualluummut akiuussuserneqarnissamut neqeroorfigineqassanngillat.