Malittarisassat nutaat: Qanigisat akiuussutissamik kapitissimasut angerlarsimaannaqqusaanerat piumasaqaataajunnaartoq

Siusinnerusukkut qanigisanut angerlarsimaannaqqusaanermut piumasaqaataasimasunit allaanerussutaa annerpaaq tassaavoq akiuussutissamik kapitissimanersutit kapitissimannginnersutilluunniit.

Ilisimatuussutsikkut paasisat nutaat Amerikamiut Centers for Disease Control and Prevention (CDC)-imeersut naapertorlugit paasineqarsimavoq inuit akiuussutissamik tamakkiisumik kapitissimasut COVID-19-imullu malunnaateqanngitsut namminneq coronavirusimik tunillatsissimagaluarlutik qaqutiguinnaq inunnut allanut tunillaasartut. Paasisat nutaat taakku tunuliaqutaralugit Kalaallit Nunaanni peqqinnissamut oqartussaqarfiit tunillatsissimasunut qanigisaasunut angerlarsimaannaqqusinermut malittarisassanik nutaanik ulluinnarni inuunermut kalluaavallaanngitsumik sananissamut periarfissaqalersimapput.

Tassa imaappoq qanigisaasuuguit akiuussutissamillu marloriarlutit kapitereersimaguit nappaammillu malunnaateqarnak angerlarsimaannaqqusaajunnaassasutit. Suliartorsinnaavutit atuariartorsinnaallutilluunniit, taamaattoq nappaalanissamut malunniuteqariataarnissat eqqumaffigissavat, tunillatsissimasumillu qanillisaqarsimaguit ullut sisamassaat arfineq aappassaalluunniit qaangiuppat misissortittassaatit.

Akiuussutissamik kapitissimanngikkuit ataasiaannarlutilluunniit kapitissimaguit qanigisaasuullutillu, taava kaammattorneqarputit ulluni arfineq marlunni angerlarsimaannaqqullutit, tunillatsissimasumullu qaninngoorsimanerpit kingorna ullut arfineq marluk qaangiuppata misissorteqqullutit.

Tunillatsissimasut qanittuusimaneq sukkut pisarpa?
Qanittuusimasutut naatsorsuunneqassaatit ataani allassimasut ilaat minnerpaamik ataaseq atuuppat:

– Tunillatsissimasup tunillaasinnaasutut naatsorsuunneqarnerata nalaani tunillatsissimasumik illoqateqarsimaguit

– Tunillatsissimasoq timaatigut attorsimagukku, soorlu eqitaarnikkut/kunissuunnikkut iml. quersortoqarsimappat/tangajortoqarsimappat

– Inuk tunillatsissimasoq meterimik ataatsimik minutsit 15 sinnerlugit qanissimagukku, soorlu oqaloqatigalugu ataatsimeeqatigaluguluunniit

Tassa qanittuusimanertut naatsorsuunneqassaatit tunillatsissimasoq timikkut attorsimagukku, iml. sivisuumik tunillatsissimasup eqqannguaniissimaguit.
Taamatut qanittuusimasut tassaagajuttarput tunillatsissimasumut ulluinnarni illoqatigiit, sinittarfimmi nalaasaarfimmiluunniit tutissimasat, eqitaarsimasat il.il. Tamatuma saniatigut tassaasarput tunillatsissimasup timikkut attuuasimasai, soorlu ikinngutit qanigisat ilaquttalluunniit.

COVID-19-imut malunnaateqaruit angerlarsimaannaqqusaassaatit
COVID-19-ip malunniutaannik malunnaateqalersimaguit, taava angerlarsimaannaqqusaassaatit misissortissaatillu. Tamanna atuuppoq aamma akiussutissamik tamakkiisumik kapineqarsimagaluaruilluunniit, akiuussutissamik kapitinneqarsimanngikkuit iml. qaammatit kingulliit pingasut iluanni tunillatsissimaguit.

Tamanna isumaqarpoq taamaallaat angerlarsimaannaqqusaassasutit COVID-19-ip malunnaataannik malunnaateqalersimaguit, qanigisaasuuguit, iml. tunillatsissimasumik illoqateqaruit inoqutigiit akornanni kisimiititaasinnaanngitsumik. Immikkut pisoqarsinnaasarpoq allatut ittumik – taamaattoqarsimatillugu Nakorsaaneqarfiup naliliinerani taamaattuni atuutissaaq.

Malittarisassat nutarterneqarsimasut tamaasa uani atuarsinnaavatit corona.nun.gl