COVID-19 pillugu akiuussutissamik kapisisarneq allanngortinnagu ingerlaqqiinnassaaq

Pingasunngornermi oktobarip arfernanni nakorsaaneqarfik aalajangerpoq akiuussutissaq Moderna-minngaanneersoq inuusuttunut 18-iliineqanngitsunut kapuutigissallugu unitsinneqarallassasoq. Tamanna pissuteqarpoq Qallunaat Nunaanni peqqinnissaqarnermi oqartussat inuusuttunut 18-iliineqanngitsunut akiuussutissatut kapuutigissallugu unitsikkallarniarlugu aalajangersimammata. Nunani Avannarlerni misissuinermi paasissutissaagallartut takutissimavaat inuusuttut Modernap akiuussutissiaanik kapitittarsimasut uummatikkut aseruuttoornermik naviananngitsumik aarlerinaateqarsinnaanera annertusisinnaasimasoq.

Nakorsaaneqarfik tamatuma kingorna Qallunaat Nunaanni peqqinnissaqarnermut oqartussanut saaffiginnissimavoq tamatuma tunuliaqutaa annertunerusumik paasinarsaqqullugu. Maanna akissuteqarsimalerput. Danmarkimi Peqqinnissamut Aqutsisoqarfik akiuussutissap Moderna-meersup atussallugu isumannanngitsuussusia pillugu nutaamik tusagassiorfinnut nalunaarusioqqammerput.

Nakorsaaneqarfiup Qallunaat Nunaanni pisortaqarfinnit siunnersuutigineqartut kingulliit tunuliaqutaralugit, tassunga ilanngullugit pisortaqarfiit allat, soorlu Naalagaaffiit Peqatigiit peqqinnissaq pillugu suleqatigiiffiat WHO aamma USA-mi Canadamilu peqqinnissaqarnermut pisortaqarfiit siunnersuutaat tunuliaqutaralugit aalajangersimapput akiuussutissamik kapisisarneq allanngortinnagu ingerlateqqinniarlugu. Akiuussutissamik kapitittarnerup pitsaaqutai saniatigut sunniutaasartut qaqutigoortut sunniutigiumaagaannit annertunerungaarput.

Kalaallit Nunaanni siullermeersumik kapitissimasut suli amerlapput, katillutik 3.500-t suli aappassaanik kapitinneqanngillat naammattumillu suli illersuuteqaratik. Aqqaneq marlunnik ukioqalereersimasut 15 %-ii, tassa 7.000-it missaat suli akiuussutissamik kapitinnissamut neqeroorut qisuariarfigisimanngilaat.

Kalaallit Nunaat, nunarsuatsinni nunat allat assigalugit siunissami sivisuumik suli COVID-19-imit ulorianartorsiortinneqartussaavoq. Ukiornera anigorluassagutsigu, kikkut tamarmik suli akiuussutissamik kapitissimanngitsut iml. akiuussuserneqarnissaminnik naammassinnissimanngitsut kaammattorneqarput piaarnerpaamik akiuussutissamik kapiteqqullugit.

Nuna tamakkerlugu akiuussutissamik kapitinnissamut periarfissat pillugit paasissutissat nakorsaaneqarfiup nittartagaani takuneqarsinnaapput.

Annertunerusumik paasissutissamik perusukkussi: Henrik L. Hansen, Nakorsaaneqarfik.