Meeqqanut 18-it inorlugit ukiulinnut Moderna-mik kapuineq sapaatit akunnerata matuma sinnerani unitsikkallarneqarpoq

Danskit Peqqinnissamut Aqutsisoqarfia ullumikkut imaattumik nalunaaruteqarpoq: “Danmarkimi maannamut meeqqat inuusuttullu 12-17-inik ukiullit pingaartumik COVID-19-imut akiuussutissaq Pfizer/BioNTech-imeersoq atorlugu kapitinnissamut qaaqquneqartarput. Mianersornissaq eqqarsaatigalugu siunissamik meeqqat inuusuttullu akiuussutissanik taassanngaanneersuinnarnik kapitinnissamut kaammattorneqartassapput.

Taamatut nalunaaruteqartoqarnera tunngavigalugu Nakorsaaneqarfik aalajangerpoq, sapaatit akunnerata matuma sinnerani inuusuttut 18-it inorlugit ukiulinnut akiuussutissamik Moderna-mik atuisarneq unitsikkallarniarlugu.

”Nunani avannarlerni ilisimatusarnerni maannamut paasisaagallartut malillugit paasineqarpoq, inuusuttuaqqat Moderna-mik kapitinnerminni uummatimikkut aseruuttoornissamut annikitsuaqqamik ulorianartorsiorsinnaasut, kisiannili kapitinnginnermi ulorianartorsiorneq annertunerussasoq qularutigineqanngilaq. Mianersornissaq eqqarsaatigalugu aalajangerpugut, danskit Peqqissutsimut Aqutsisoqarfiat suleqatigalugu suliatigut itisiliiffiusumik nalilersuinitsinni nunatsinni 18-it inorlugit ukiullit akiuussusersorneqarnerat unitsikkallarniarlugu,” nakorsaaneq Henrik L. Hansen oqarpoq.

Aamma Moderna atuinnarutsigu ulorianartorsiortoqarsinnaanersoq pillugu nalilersuinerput aallartereerpoq.

”Ullumi danskit Peqqiissutsimut Aqutsisoqarfianni akiuussusersuinermut immikkut ilisimasallit pissutsit pillugit oqaloqatiginiarlugit attaveqarfigaakka. Kalaallit Nunaanni pissutsit Danmarkimut naleqqiullutik allaanerujussuupput, ilaatigut illoqarfiit annerit avataanni Pfizer-BioNTech atorlugu akiuussusersuinissaq ajornakusoormat. Kalaallit Nunaanni unammilligassat immikkut ittut pillugit ulluni tulliuttuni sukumiisumik oqaloqatigiinniarluta isumaqatigiippugut,” Henrik L. Hansen oqarpoq.

Danmarkimi uummatimik nukiisigut aseruuttoortunik amerlanerusunik, imaluunniit akiuussutissat marluusut taakku assigiinngissuteqartoqarnerinik malussartoqanngilaq, taamaakkaluartorli paasissutissat tamanut saqqummiunneqartut tunngavigalugit danskit oqartussaasui Moderna-mik inuusuttunut 18-it inorlugit ukiulinnut atuinerminnik unitsitsiniarlutik aalajangerput.

”Kalaallit Nunaanni meeqqat inuusuttullu 3.000-it sinnerlugit amerlassusillit Moderna-mik kapivagut. Uummatimi nukingatigut aseruuttoortoq ataaseq naammattoorparput, taannali katsorsarneqarani nammineerluni aaqqippoq. Kisianni inuit tamat akiuussutissaatitsinnut tatiginnissinnaanissaat pingaaruteqarpoq, taamaattumillu Peqqissutsimut Aqutsisoqarfik qinnuigaara, sulianut tunngatillugu naliliiniarnitsinni ikiuuteqqullugu,” Henrik L. Hansen oqarpoq.

Uummatip nukingatigut aseruuttoornerit kingunerluutaapput qaqutigoortorujussuit, amerlanertigullu sakkukitsumik atorneqareerlutik namminneerlutik qaangiuttarput. Katsorsarneqarnissaq pisariaqartillugu katsorsaanissamut periarfissat pitsaasorujussuupput.