Tunillatsissimasut nutaat qulingiluat – Nuummi inuusuttuaqqat akornanni tuniluunneq
Kingullermik nutarterneqarpoqUllup unnuallu kingulliup ingerlanerani Kalaallit Nunaanni coronavirusimik tunillatsissimasut paasineqartut qulingiluat. Tunillatsittuni tallimat Nuummiipput, pingasut Sisimiuniillutik ataaserlu Aasianniilluni.
“Ullup unnuallu kingulliup iluani tunillatsissimasut kisitsisaat ikinnerugaluartut suli Nuummi, Aasianni, Upernavimmi Sisimiunilu tuniluuttoqarpoq. Illoqarfinni sisamani taaneqartuni mianersortoqangaatsiassaaq”, Nunatsinni nakorsaaneq Henrik L. Hansen taama oqarpoq.
Nuummi tunillatsissimasut tallimaasut tamarmik inuusuttuaraapput, ataaserlu Nuummi GUX-mi ilinniartuulluni. Taamak ineriartortoqarnera Nuummi tuniluuttoqarneranik takussutissaavoq. Taamak inissisimasoqarnera peqqutigalugu Nuummi Misissuivik nal. pingasut tungaanut ammavoq.
“Inuusuttut uagut ukioqqortunerulaartuniit ataatsimoornerusarput, taamaammat nunani allani inuusuttut akornanni tuniluunnerit sukkasuupilussuarmik pisarput. Nunatsinni inuusuttut ersiutit eqqummaariffigilluassavaat oqartussallu innersuussutaat malissavaat”, Henrik L. Hansen oqarpoq.
Ullup qeqqanngilaattaani inuit hunnorujut sinneqartut namminneq kajumissusertik atorlugu Nuummi misissortikkiartukaapput.
Pituffimmi/Thule Air Basemi tuniluunneq
Inuit tunillatsissimasut qulingiluat illoqarfinniittut saniatigut Thule Air Basemi inuit pingasut tunillatsissimapput. Tunillatsittut ilaat ataaseq Thule Air Basemi tunillatsissimavoq marlullu Thule Air Base avataani tunillatsissimallutik. Sakkutooqarfimmi imaluunniit inoqarfiit qanittuaniittuni tuniluuttoqarsinnaaneranik aarlerinartoqanngitsoq nalilerneqarpoq.