Corona.nun.gl-imi kisitsisit: Uku alaatsinaassavatit
Kingullermik nutarterneqarpoqTunillanneqartut katillugit, tunillanneqartut, tunillatseqqasut. Ullormut tunillatsissimasut kisitsisitaat saqqummiunneqaraangata kisitsisit suut alaatsinaanneqartassappat?
Nakorsaaneq Henrik L. Hansen nalorninngilaq. Tunillatsittut nutaat kisitsisit isiginiarneqassapput.
”Tunillatseqqasut nutaat kisitsisitaat maannarpiaq inuiaqatigiinni tuniluunnermut takussutissaapput pitsaanerpaat. Taakku aatsaat tunillatsissimasut paasineqarput, qanittorlu tikillugu inuiaqatigiit akornanniissimallutik. Tunillatsittut nutaat tunillatsissimallutik paasisimavaat mattusimallutillu, Henrik L. Hansen oqarpoq.
Tunillatseqqasut amerlassusii isiginiarpallaaraanni, aamma pissutsit qanoq innerinut assiliaq kukkusunngorsinnaavoq.
”Tunillatsissimasoq aatsaat kissarneqarunnaarnerminiit ersiuteqarunnaarnerminiillu ullut unnuallu pingasut qaangiunnerini AAMMA ersiuteqarnerup aallartinneraniit ullut unnuallu qulit qaangiunnerini aaqqittutut nalunaarutigineqartarpoq. “Nakorsaaneqarfimmi peqqinnissaqarfiup tunillatsissimasup aaqqinnera nalunaarutigippagu tunillatsissimasoq aaqqittutut nalunaarsorneqartarpoq, aammalu nalunaaruteqarnerit kinguaattoorsinnaapput”, Henrik L. Hansen oqarpoq.
Kisiannili aamma tunillatsissimasut nutaat amerlassusii allanngorarsinnaapput, tunillaassuunnerup allanngorneranut takussutissatut qularnaatsutut atorneqarsinnaanatik. “Ullut ilaanni illoqarfimmi ataatsimi amerlanerusuniluunniit misissugassatut tigusat ullormik unnuamillu ataatsimik kinguaattoorsinnaapput. Ulluni taakkunani ullormut kisitsisit pitsaanerusutut isikkoqareerlutik tassanngaannaq ajorseriaqqissinnaapput. Tamanna sillimaffigisinnaanngilarput, kisiannili taamaattoqartillugu ilisimatitsissutigisassavarput, Henrik L. Hansen oqarpoq.
Tunillatsissimasut kisitsisitaat tunngaviusumik ullut tamaasa nal. 12.00 corona.gl manna aqqutigalugu tamanut ammasumik saqqummiuttarpagut.