Sisimiuni tuniluunneq: Tuniluunnerli suli qaangiutinngilaq

Kingullermik nutarterneqarpoq

Sapaatit akunneranni ataatsimi Sisimiuni tunillatsissimasut amerlangaatsiareersut, ullumi tunillatsissimasut isumalluarnermik pilersitsilaarnissamut tunngavissaqarput. Ullup unnuallu ataatsip kingulliup ingerlanerani tunillatsissimasut arfinillit paasineqarput.

“Inuit misissortittut amerlangaatsiarmata, misissuinerit inerneri tuniluunnerup annikilliartorneratut isigisinnaavagut,” nakorsaaneq Henrik L. Hansen oqarpoq.
Maanna tuniluunnerup 3. august 2021-mi tuniluutilerneraniit inuit 3.052-it misissortissimapput, taakkunannga misissugassat 3.448-t tiguneqarsimallutik. Tassalu innuttaasunit 54%-it misissortissimapput. Taakknannga 74-it Covid-19-imik tunillatsissimasut paasineqarpoq, tassalu misissukkat 2,4%-iinik amerlassuseqarlutik. Misissukkat amerlassusii eqarsaatigalugit tunillatsissimasut amerlapput.

Tunillatsissimasut ikittuinnaat nassaarineqaraluartut nakorsaaneq erseqqissaavoq, Sisimiuni tunillatsissimasut kisitsisinngorlugit katinnerini suli amerlasut. Sisimiuni ullut unnuallu kingulliit arfineq marluk ingerlanerini tunillatsissimasut 53-iummata, inuit 100.000-iugaangata 943-t tunillatsissimanerisa naligaa, tamannalu suli tunillatsissimasut amerlasoorujussuunerinut takussutissaavoq.

”Misissortinnissamut kajumissuseq annertusimavoq, kisiannili suli illoqarfimmi suminngaanneerfiinik ilisimaneqanngitsumik tuniluuttoqarpoq. Tunillatsissimasut, suminngaanneerfiinik ilisimanngisagut nassaarisagut suli amerliartorput. Taamaattumik inuit tamarmik qanillinaveersaarnissaat katerittunullu ornigunnaveersaarnissaat, aammalu assamminnik eqqiluisaartitsilluarnissaat inassutigaarput, Henrik L. Hansen oqarpoq.

Nuummi inuk illoqarfimmi ulloq unnuarlu paaqqinnittarfimmi najugalik Covid-19-imik tunillatsissimasoq nassaarineqarpoq. Pineqartoq Covid-19-imut ersiuteqarnini pissutigalugu misissortissimavoq. Tunillatsiffia suminngaanneernersoq ilisimaneqanngilaq. Ulloq unnuarlu paaqqinnittarfimmi najugallit amerlanersaat kapuinermi naammassinnissimapput, taamaattumillu annertunerusumik tuniluuttoqalernissaa killeqartutut isigineqarpoq. Ulloq unnuarlu paaqqinnittarfimmi sulisorpassuit najugallillu inuiaqatigiinni amerlasuunut attaveqartarput. Taamaattumik Nuummi tuniluuttoqarnerata annertusinissaa ilimanaateqaqqilerpoq.