12-iniit 15-inut ukiullit kapitissinnaangajalersut

Kingullermik nutarterneqarpoq

Maannamut Kalaallit Nunaanni innuttaasut Coronavirus-imut akiuussutissamik kapitissagunik 16-ileereersimasariaqarput, kisiannili maanna 12-iniit 15-inut ukiulinnut nutaarsiassaq nuannersoq takkuppoq.

Nakorsaaneqarfimmit nalunaarutigineqarmat, peqqissutsimik suliallit naliliinerat malillugu meeqqat 12-iniit 15-inut ukiullit Covid-19-imut akiuussutissamik kapitinnissamut neqeroorfigineqarnissaat naapertuuttoq isumannaalluinnartuusorlu tamanna Naalakkersuisuniit akuerineqarpoq.
ā€¯Meerarpassuit angajoqqaavilu akiuussutissamik kapitinnissamut akuersaarumaartut neriuutigaara. Inuit kapitissimasut amerliartortillugit tuniluunneq annikilliartortussaavoq, taamaattumillu Covid-19-ip akiorniarneqarnera ajornannginnerusussaalluniā€¯, Peqqissutsimut Naalakkersuisoq Kirsten L. Fencker oqarpoq.

Taamattuttaaq Danmarkimi Peqqissutsimut Aqutsisoqarfik inerniliivoq, meeqqat taamatut ukiullit neqeroorfigineqarnerini iluaqutissat ajoqutaasinnaasunit amerlanerusut.

Qaammatip matuma siuliani akiuussutissanik kapuinermi neqerooruteqartarnermut arnat naartusut milutsitsisullu ilanngunneqarputtaaq.

Peqqinnissaqarfik 12-iniit 15-inut ukiullit akiuussutissanik kaporneqarnissaannik pilersaarusiuleruttorpoq. Suliassat tamarmik inisseriarpata tamanna tusagassiorfitsigut aamma corona.gl aqqutigalugu nalunaarutigineqassaaq.