Sisimiut 3. august 2021-mi Sisimiuni tuniluuttoqarpoq
Kingullermik nutarterneqarpoqMarlunngornermi aggustip pingajuanni Sisimiuni tunillatsissimasut sisamat nassaarineqarput. Piffissami sivitsulersumi illoqarfimmi tunillatsisimasunik nassaartoqanngereersoq maanna nassaartoqaqqippoq.
Tuniluunneq suminngaanneernersoq ilisimaneqanngilaq. Tunillatsissimasut marluk ilaqutariipput, imminnullu tunillassimallutik.Maannamut paasisat aallaavigalugit tunillatsissimasut allat marluk imminnut attaveqarsimanngillat. Taamaammat Sisimiuni tunillatsissimasunik ilisimaneqanngitsunik arlalinnik peqarsimassasoq ilimanaateqarpoq.
Tunillatsissimasunit ataaseq peqqinnissaqarfimmi atorfeqarpoq. Pineqartoq akiuussutissamik kapitissimammat tuniluunnerup annertunerunissaa ilimananngilaq. Taamaakkaluartoq sulisut, napparsimasut qanigisaasullu akornanni tuniluuttoqaqqinnissaa pinaveersaarniarlugu arlalinnik iliuuseqartoqarpoq.
Tamakkiisumik kapitissimasut Covid-19-ip immikkoortuanik Delta-mik tunillatsissinnaasut, ersiuteqalersinnaasut qaqutiguinnarlu napparsimarujussualertartut uppernarsarluarneqarsimalereerpoq. Aamma allanut tunillaasinnaapput, kisiannili tamanna kapitissimanngitsunut naleqqiulluni qaqutigoornerujussuuvoq.
Sisimiuni tuniluunnerup unitseriarneqarnissaa siunertaralugu tunillatsissimasunut qanillisimasunik misissuinermik annertunerusumik maanna aallartitsisoqarpoq.