2. aggustimi tunillatsissimasut nutaat arfineq pingasut

Kingullermik nutarterneqarpoq

Ataasinngornermi misissuinerit inernerini tunillatsissimasut arfineq pingasut nutaat paasineqarput: Aasianni tunillatsissimasut nutaat arfinillit, Qasigiannguani inuk ataaseq kiisalu Nuummi inuk ataaseq. Timmisartunut ilaasimasut imerniartarfinniissimasullu misissorneqassapput.

Ataatsimut isigalugu ullup unnuallu kingulliup ingerlanerani tunillatsissimasut arfineq pingasunik ilaqqipput. Upernavimmi sumiiffinnilu arlalinni allani imaluunniit misissueqqissaarnissamut killilinnik atortulinni misissuisoqarpoq. Sumiiffinni taakkunani misissugassatut tigusat marlunngornermi Ilulissanut tikiunneqarnissaat naatsorsuutigineqarpoq.

Timmisartunut ilaasimasut imerniartarfinniissimasullu misissorneqassapput
Tunillatsissimasut nutaat tamarmik tunillatsereernerminni angalasimapput. Taamaattumik tuniluuttoqaqqissimanissaa ilimanaateqartorujussuuvoq. Tuniluunnerit Upernavimmi Aasiannilu tunillatsissimasunit ilisimaneqartunit pisimapput, taamaattumillu nualluut tuniluutiasorujussuaq Delta atugaasimassasoq ilimanaateqarluinnarpoq.

27. juli 2021-mi Upernavimmiit Ilulissanut timmisartumi (GL 205) kiisalu 28. juli 2021-mi Ilulissaniit Aasiannut timmisartumi (GL 533) tunillatsissimasunik ilaasoqarsimavoq. Timmisartunut taakkununnga ilaasimasut tamarmik pilertornerpaamik misissorteqqullugit, aammalu misissortinnerit inernerisa paasineqarnissaanut mianersorluaqqullugit kaammattorneqarput.

Aamma 28. juulimi unnunnerani Qasigiannguani Uilu-baarimiissimasut akornanni tuniluuttoqarsimasinnaavoq. Inuit piffissami pineqartumi imerniartarfimmiissimasut aamma kaammattorneqarput, pilertornerpaamik misissorteqqullugit, aammalu misissortinnerit inernerisa paasineqarnissaanut mianersorluaqqullugit.

Tunillatsissimasunut qanillisimasut
Tunillatsissimasut maanna angerlarsimaffimminni mattusimapput aammalu tunillatsissimasunik ujarlerneq ingerlaqqippoq. Tunillatsissimasunut qanillisimasut Corona pillugu Allattoqarfimmiit attaveqarfigineqassapput.

Tunillatsissimasunut qanillisimasut ulluni arfineq marlunni, tassalu piffissamit tunillatsiffiusimasinnaasumiit naatsorsorlugu angerlarsimaannassapput. Ullut arfineq aappassaanni tunillatsissimasumut qanillisimasut PCR-imut misissortissapput, tunillatsissimannginnerlu paasineqarpat angerlarsimaannartussaatitaaneq unissaaq.

Angerlarsimaannartussaatitaanerup uninnginnerani misissuinermi tunillatsissimannginneq paasineqaraluarpalluunniit, qanillineqarsimasut ullut arfineq aappassaanni misissuinermi tunillatsissimannginnerup paasineqarnissaata tungaanut angerlarsimaannassapput. Tunillatsinnermiit misissuinermi tunillatsissimanerup takutinneqarnissaata tungaanut piffissaq sivisulaartuaannarpoq, piffissamilu tassani allanut tunillaasoqarsinnaavoq.

Aamma qanillisimasut Covid-19-imut ersiutaasinnaasut Covid-19-imik tunillatsissimasumut qanillinermiit ullut 14-it ingerlanerini annertunerusumik eqqumaffigissavaat.

Eqqaamallugu
Kalaallit Nunaanni tuniluunneq ima annertutigivoq, nunatsinni sumiluunniit tunillatsissimasunik nutaanik paasisaqartoqarsinnaalluni. Angalangaatsiartoqartarpoq, tamannalu tuniluunnermut pisooqataavoq. Tuniluuttoqaqqinnissaa pinngitsoortinneqarsinnaanngilaq.

Taamaattumik innuttaasut tamarmik kaammattorneqarput, ersiuteqalernissaq eqqumaffigilluaqqullugu aammalu innersuussutit tamakkiisut eqqaamasaqqullugit. Qanillinaveersaarit, assatit errortorluartakkit, tallinnut tangajortarit/quersortarit aammalu Covid-19-imut ersiuteqaruit tunillatsissimasumulluunniit qanillisimaguit angerlarsimaannarit misissortillutillu.