Marlunngormat Danmarkimiit tikissimasut aamma Narsarsuarmut timmisartumut ilaasimasut tamarmik mississorteqqissapput

Kingullermik nutarterneqarpoq

Sisimiut aamma Qaqortoq
Sisimiuni inuit marluk Qaqortumilu inuk ataaseq Coronavirusimik tunillatsisimasut ippassaq paasineqarput. Inuit taakku pineqartut, arfininngormat tunillatsisimasutut siumorneqartut timmisartorsuarmi ilaaqatigisimavaat, naak eqqaani issiasimanngikkaluarlutik. Taamaammat marlunngormat juulip arfernani Københavnimiit Kangerlussuarmut timmisartorsuarmut ilaasimasut tamarmik angerlarsimaannaqquneqarput misissorteqqinnissaanillu kaammattorneqarlutik, aamma tamakkiisut akiuussutissinneqarsimagaluarunik imaluunniit ullut tallimassaanni misissortereersimagaluarunik.

“Coronavirusit ilaat tuniluunnerujussuaq pineqarsimasinnaanera ilimanaateqarpoq. Maanna tunillatsisimasut ullut tallimassaani misissortinnermi positiveusimanngitsut paasivarput. Taamaammat arfininngormat ullut tallimassaani misissortissimasut tamarmik angerlarsimaannarnissaat aammalu misissorteqqinnissat pingaaruteqarluinnarpoq”, Nunatsinni nakorsaaneq Henrik L. Hansen taama oqarpoq.

Tunillatsisimasoq ataaseq Sisimiuni arlalinnik attaveqarsimanera peqqutigalugu, Sisimiuni innuttaasut tamarmik ersiuteqarnerlutik eqqummaariffigissaat kaammattorneqarput, aamma minnerpaamilluunniit ersiutinik takussutissaqartillugu misissortinnissaat pingaaruteqarpoq.

Narsarsuarmut timmisartumut ilaasimasut tamarmik misissorneqassapput
Ataasinngornermi unnukkut aamma inuit marluk Coronavirusimik tunillatsissimasut paasineqarpoq. Taamaalilluni ataasinngornermi tunillatsissimasutut paasineqartut katillugit inuit tallimanngorlutik.

Tunillatsissimasut allat marluk ulloq 8. juuli Nuummiit Narsarsuarmut GL421-mi ilaasimapput. Ilaasoq nunami allami tunillatsissimassangatinneqartoq aamma ulloq 6. juuli GL427-mi ilaavoq. Timmisartoq taanna Kangerlussuarmiit Narsarsuarmut ingerlasussaagaluartoq Nuummut tikittussanngortinneqarpoq.

Angalanerni taakkunani marlunni ilaasimasut tamarmik maannakkumiit angerlarsimaannaqquneqarput, piaartumillu misissortillutik.

Misissortinnissamut periarfissat
Marlunngorpat juulip 13-iani inassuteqaateqarfigineqartunut tamanut misissortinnissamut periarfissat imatut isikkoqarput:

Nuuk
Inuit timmisartuni il.il. tunillatsissimasinnaasut nal. 10:30-miit 12:00-imut misissortissinnaapput.
Ullut tallimassaanni misissortinnerit nalinginnaasut nalinginnaasumik 08:15-imiit 10:00-imut ammasarput.
Misissuinerit Misissuivimmi, siornatigut Kalaaliaraasimasumi, Nuup qeqqani Brugsenip eqqaaniittumi ingerlanneqartarput.

Qaqortoq
Napparsimmavimmi misissuinissat nal. 09:00 ammassapput.
Misissuineq nunap immikkoortuata napparsimmaviani ingerlanneqassaaq.

Ilulissat
Inuit timmisartuni il.il. tunillatsissimasinnaasut napparsimmavimmi nal. 13-imiit misissorneqarsinnaapput.
Ullut tallimassaanni misissortinnerit nalinginnaasut nalinginnaasumik 09:00-imiit ammasarput.
Misissuineq nunap immikkoortuata napparsimmaviani ingerlanneqassaaq.

Illoqarfinni allani nunaqarfinnilu
Sumiiffinni allani ammarfissat pillugit najukkani peqqissaavinni saaffiginninnikkut paasiniaasoqarsinnaavoq.

Covid-19-imik ersiuteqalersut tamarmik erngerlutik oqarasuaatikkut peqqissaavimmut qaninnermut imaluunniit nunap immikkoortuani napparsimmavimmut misissortinnissamik isumaqatigiissuteqarniarlutik saaffiginneqqullugit qinnuigineqarput.

Angalasut akornanni suli paasineqanngitsunik tuniluuttoqarsimasinnaavoq. Taamaattumik kikkut tamarmik qinnuigineqarput, tuniluuttoqannginnissaa anguniarlugu ikiuuteqqullugit. Qanillinaveersaarit timikkullu attuinaveersaarit, errortorluartarit aammalu malunniuteqaruit angerlarsimaannarit.