Tunillatsissimasut pingasut allat: Marlunngormat Danmarkimiit tikissimasut tamarmik mississorteqqissapput

Kingullermik nutarterneqarpoq

Sisimiuni inuit marluk Qaqortumilu inuk ataaseq Coronavirusimik tunillatsisimasut ullumi paasineqarput. Inuit taakku pineqartut, arfininngormat tunillatsisimasutut siumorneqartut timersartorsuarmi ilaaqatigisimavaat, naak eqqaani issiasimanngikkaluarlutik.

Taamaammat marlunngormat juulip arfernani Københavnimiit Kangerlussuarmut timmisartorsuarmut ilaasimasut tamarmik angerlarsimaannaqquneqarput misissorteqqinnissaanillu kaammattorneqarlutik, aamma tamakkiisut akiuussutissinneqarsimagaluarunik imaluunniit ullut tallimassaanni misissortereersimagaluarunik.

“Coronavirusit ilaat tuniluunnerujussuaq pineqarsimasinnaanera ilimanaateqarpoq. Maanna tunillatsisimasut ullut tallimassaani misissortinnermi positiveusimanngitsut paasivarput. Taamaammat arfininngormat ullut tallimassaani misissortissimasut tamarmik angerlarsimaannarnissaat aammalu misissorteqqinnissat pingaaruteqarluinnarpoq”, Nunatsinni nakorsaaneq Henrik L. Hansen taama oqarpoq.

Tunillatsisimasoq ataaseq Sisimiuni arlalinnik attaveqarsimanera peqqutigalugu, Sisimiuni innuttaasut tamarmik ersiuteqarnerlutik eqqummaariffigissaat kaammattorneqarput, aamma minnerpaamilluunniit ersiutinik takussutissaqartillugu misissortinnissaat pingaaruteqarpoq.

Coronavirusit ilaat tuniluunnerusoq Kalaallit Nunaannut apuussimanersoq oqaatigissallugu suli siusippallaarpoq, sapaatip akunnerata naanerani misiliutaasimasut ullumikkut Danmarkimut nassiunneqarput, misissorneqarnissaat siunertaalluni.

Nunatsinni nakorsaaneq naapertorlugu, tunillaasoqarnerit kingulliit takutippaat Corona nunatsinnut apuunnissaa ingalassimaartinnissaa ajornakusuussasoq. Taammaammat innuttaasut tamarmik akiuussutissamik kapitinnissaannut nakorsaarneq kaammattuivoq.

“Tunillaanerit kingulliit takutippaat akiuussutissinneqarnissamik neqeroorfigineqartut tamarmik akiuussutissamik kapitinnissaat qanoq pingaaruteqartiginersoq. Naak akiuussutissaq 100 procentimik tunillanneqarnissamut illersuinngikkaluartoq, misilittakkat takutippaat akiuussutissamik kapitissimasut sakkukinnerujussuarmik napparsimasartut“, Nunatsinni nakorsaaneq Henrik L. Hansen taama oqarpoq.

Misissortinnissamut periarfissat
Marlunngorpat juulip 13-iani inassuteqaateqarfigineqartunut tamanut misissortinnissamut periarfissat imatut isikkoqarput:

Nuuk:
Inuit timmisartuni il.il. tunillatsissimasinnaasut nal. 10:30-miit 12:00-imut misissortissinnaapput.
Ullut tallimassaanni misissortinnerit nalinginnaasut nalinginnaasumik 08:15-imiit 10:00-imut ammasarput.
Misissuinerit Misissuivimmi, siornatigut Kalaaliaraasimasumi, Nuup qeqqani Brugsenip eqqaaniittumi ingerlanneqartarput.

Qaqortoq:
Napparsimmavimmi misissuinissat nal. 09:00 ammassapput.
Misissuineq nunap immikkoortuata napparsimmaviani ingerlanneqassaaq.

Ilulissat:
Inuit timmisartuni il.il. tunillatsissimasinnaasut napparsimmavimmi nal. 13-imiit misissorneqarsinnaapput.
Ullut tallimassaanni misissortinnerit nalinginnaasut nalinginnaasumik 09:00-imiit ammasarput.
Misissuineq nunap immikkoortuata napparsimmaviani ingerlanneqassaaq.

Illoqarfinni allani nunaqarfinnilu:
Sumiiffinni allani ammarfissat pillugit najukkani peqqissaavinni saaffiginninnikkut paasiniaasoqarsinnaavoq.

Covid-19-imik ersiuteqalersut tamarmik erngerlutik oqarasuaatikkut peqqissaavimmut qaninnermut imaluunniit nunap immikkoortuani napparsimmavimmut misissortinnissamik isumaqatigiissuteqarniarlutik saaffiginneqqullugit qinnuigineqarput.

Angalasut akornanni suli paasineqanngitsunik tuniluuttoqarsimasinnaavoq. Taamaattumik kikkut tamarmik qinnuigineqarput, tuniluuttoqannginnissaa anguniarlugu ikiuuteqqullugit. Qanillinaveersaarit timikkullu attuinaveersaarit, errortorluartarit aammalu malunniuteqaruit angerlarsimaannarit.