Eqikkaaneq

Ullup unnuallu kingulliup ingerlanerani Nuummi tunillatsissimasut 20-t aamma Sisimiuni sisamat nassaarineqarput.

 

Sisimiuni atuarfimmi ataatsimi tunillaasimasutut ilisimaneqartoq tuniluutsitsivoq, kisiannili aamma tunillatsissimasoq ataaseq ilisimaneqanngitsumiit tunillatsissimavoq. Tassalu suli Sisimiuni tuniluuttoqarpoq.

 

Aamma ullup unnuallu kingulliup ingerlanerani misissuinerit inernerisa takutippaat, Nuuk tamakkerlugu inuiaqatigiinni tuniluuttoqarsinnaasoq. Suli ulluunerani paaqqinnittarfinnut tallimanut, atuarfinnut ilinniarfinnullu pingasunut attuumassutilinnik nutaanik tunillatsittoqartarpoq. Sapaatiummat Annaassisitta Oqaluffiani naalagiartitsinermi naalagiaqataasoq tunillaasimassasoq ilimanarpoq.

 

Ullormut innersuussutit:

Oqartussaasut innersuussutaat malikkit. Qanillinaveersaarit, errortukulagit katersuuttullu annertuut pulaffiginaveersaakkit. Killilersuisoqalernissaanik pilersaaruteqartoqanngilaq.