Eqikkaaneq

Nuummi Sisimiunilu tunillatsittut nutaat arfineq marluk

Ullup unnuallu kingulliup ingerlanerani Kalaallit Nunaanni Cornavirusimik tunillatsissimasut arfineq marluk nassaarineqarput. Sisamat Sisimiuneersuupput pingasullu Nuummeersuullutik.

Nuummi ulluunerani paaqqinnittarfimmi kattussiviusumi Timmiaaqqat-ni meeraq ataaseq sulisorlu ataaseq Covid-19-imik tunillatsissimasut paasineqarpoq. Tamanna pissutigalugu paaqqinnittarfik ullumi marlunngornermi 7. septembarimi matoqqassaaq. Ullumi meeqqat paaqqinnittarfimmilu sulisut tamarmik Coronavirusimut misissortissapput, taakkulu inerneri pigineqaleriarpata Kommuneqarfik Sermersuumi Meeqqanut Atuarfinnullu Ingerlatsiviup Corona pillugu Allattoqarfik suleqatigalugu matusineq sivitsorneqassanersoq isummerfigissavaat.

Taakku saniatigut Nuummi Majoriami ilinniartoq ataaseq tunillatsissimavoq, tunillatsissimasullu atuaqatai tamarmik ullumi misissortissapput.

Nuummi tunillaassunnerit marluusut imminnut attuumassuteqanngillat, taamaattumillu tunillaassuunnermi aallaaviusut ilisimaneqanngitsut marluupput.

Inunnit misissugassatut tigusat nassiunneqartut amerlammata, ullumi aqagulu Nuummi Misissuisarfik nal. 14.00-ip tungaanut immikkut ittumik ammassaaq.

Sisimiuni tunillatsissimasut sisamaasut tamarmik ilisimaneqareersuniit tunillatsissimapput.