Maanna Kangerlussuarmi killilersuisoqalerpoq

Kingullermik nutarterneqarpoq

Kangerlussuarmi tunillaassuuttoqalersimavoq, tuniluunnerullu pilerfia ilisimaneqanngilaq, taamaattuumik Kangerlussuarmi killilersuisoqalerpoq.

Kangerlussuarmi misissuisinnaaneq killeqarnera peqqutigalugu illoqarfinni nunaqarfinnilu Covid-19-ip tuniluuffigisaani qanermut kiinnamulluunniit assiaquteqarnissamut piumasaqaat Kangerlussuarmi taamaallaat atuuppoq.

Illoqarfinni nunaqarfinnilu Covid-19-ip tuniluuffigisaani qanermut kiinnamulluunniit assiaquteqarnissamut piumasaqaat
Illoqarfinni nunaqarfinnilu ulluni 14-ini kingullerni Covid-19-imik, aallaavii ilisimaneqanngitsumik tuniluuttoqarneranik paasisaqarfiusuni 12-inik ukiulinniit qummut ukunaniinnerminni qanermut kiinnamulluunniit assiaqutinik atuissapput:

  • Inini tamanit iserfigineqarsinnaasuni isersimanerminni
  • Ulluinnarni atugassanik pisiniarfinni kiffartuussivinnilu sulisut atuisunut attaveqartartut suliaminnik isumaginninnerminni
  • Assartuutinut tamanit atorneqarsinnaasunut ilaanerminni, taakkununngalu bussit taxallu ilaapput. 

Taamaalilluni piumasaqaat aamma assersuutigalugu oqaluffinnut pisiniarfinnullu atuuppoq.

Uku maleruagassanut ilaatinneqanngillat:

  • Inuit sianissutsimikkut ajoqutillit, timimikkut tarnimikkulluunniit sanngiitsut allatulluunniit ajoqutillit, taamaalillutillu qanermut kiinnamulluunniit assiaqutinik atuisinnaanngitsut qanermut kiinnamulluunniit assiaqutinik atuinissamut piumasaqaammut ilaatinneqanngillat.
  • Ulluinnarni atugassanik pisiniarfinni kiffartuussivinnilu sulisut qanermut kiinnamulluunniit assiaqummik atuinatik plastikki assiaqut, atuisut sulisullu akornanni assiaqutaasumik atuisinnaapput.

Kiisalu qanermut kiinnamullu assiaqutit tamakkiisumik ilaannaasumilluunniit peerneqarsinnaapput, soorlu:

  • Nerinermi imernermilu.
  • Nakorsaatinik iisinermi.
  • Inunnik aatsaat qaneq isigalugu oqalunnermik paasinnissinnaasunik oqaloqateqarnermi.
  • Qanermut kiinnamulluunniit assiaqut peqqutigalugu anersaartorniapiloornermi merianngunermiluunniit.
  • Politiit kinaassutsimik paasiniaanerini.
  • Timersornerup nalaani

Nalunaarut tamakkerlugu uani atuarsinnaavat