Coronamik toqquteqartoq siulleq: Upernavimmi utoqqaq toqukkut qimaguppoq

Kalaallit Nunaanni Coronamik toqquteqartoq siulleq toqukkut qimaguppoq. Angut utoqqaq Upernavimmeersoq, Upernaviup Peqqissaaviani uninngasoq COVID-19-imik toqquteqarpoq.

Ulluni kingullerni Upernavimmi nunaqarfiinilu tunillaassuunnerup aallaaviinik annertuumik ujaasisoqarpoq, suliarlu taanna sapaatit akunnerata naanerani ingerlaqqissaaq. Maannamut paasisaagallartut takutippaat sumiiffimmi inuiaqatigiit akornanni annertungaatsiartumik tuniluuttoqartoq.

”Toqusoqartarnera tamatigut alianartuusarpoq. Ajoraluartumik maani nunatsinni tuniluuttoqarnerani naatsorsuutigineqarluinnartutut nappaat inuunermik akeqartartussanngorpoq aammalu nunarsuarmi sumiiffinni allanisulli ineriartulerluni. Nunatsinniittut tamaasa akiuussutissamik kapiteqqullugit aammalu tuniluunneq pinaveersaarniarlugu maleruagassanik tunngaviusunik malinneqqullugit kaammattuinnarsinnaavakka. Tamanna napparsimaruluttut amerlassusissaannik killilersuiniarnermut amerlanerusullu toqunissaannik pinaveersaartitsinermut pitsaanerpaavoq”, nakorsaaneq Henrik L. Hansen oqarpoq.