Nuummi killilersuinerit

Kingullermik nutarterneqarpoq

*Nutartsigaq ulloq 18/11-2021: Naalakkersuisut partiit siuttuisa isumasioqatigereerlugit, tamakkiisumik akiuussuserneqarsimasut coronamik tunillatsissimannginnermut uppernarsaammik takutitseqqaanngikkaluarlutik Nuummiit aallarsinnaanngortut aalajangiissutigaat. Taamaattorli Nuummiit aallarusuttut allat coronamik tunillatsissimannginnermut uppernarsaateqarnissaat suli piumasaqaataavoq.

Illoqarfimmi pingaanersaani corona annertuumik tuniluunnera pissutigalugu Naalakkersuisut aalajangerput 13. november-imiit 27. november 2021 ilanngullugu Nuummi killilersuisoqalissasoq.

Katersuunnerit: Annerpaamik inuit 20

Aaqqissuussinerit, nalliuttorsiornerit, sammisaqartitsinerit assigisaalluunniit amerlanerpaamik inunnik 20-nik peqataasoqaqqusaapput. Tamanna illup iluani silamilu aaqqissuussinernut atuuppoq.

Pisiniarfinni kiffartuussinermillu ingerlatsivinni atuutsinngilaq.

Nuumminngaanniit angalanermi piumasaqaatit

Inuit Nuummiiit nunatta sinneranut angalaniarlutik aallartussat akiuussuserneqarsimassapput imaluunniit PCR-imik misissortinnermi tunillatsissimannginnermik uppernarsaammik annerpaamik 48-tiiminik pisoqaassusilimmik takutitsissapput.

Naalakkersuisut tusagassiorfinnut katersortitsereernerata kingorna Nunatta Nakorsaaneqarfia peqatigalugu aalajangerput aallarnissamut killilersuutit ataasinngornermiit 15. november atuutilissasut.

Inuit tullinnguuttut makku Nuummiit aallalernermi piumasaqaatinut ilaatinneqanngillat, taamaattorli tunillatsissimannginnermut uppernarsaat pineqanngilaq:

  • Inuit Nuummiit angerlarniarlutik aallartut.
  • Inuit ilinniariarlutik aallartut.
  • Inuit inuiaqatigiinni suliassaqartitaallutik angalasariaqartut.
  • Inuit Covid-19-imut akiuussutissamik kapitinnissamut Nunatta Nakorsaaneqarfianit nalinginnaasumik innnersuunneqanngitsut.
  • Inuit 11-nik ukiullit ukiukinnerusulluunniit.
  • Sulisut tamanut angallassissummi pineqartumi aallartussanik atorneqartussanik sulisut.
  • Inuit Nuummiit nunatta avataanut angalasussat nunatta iluani pisariaqanngitsumik uninngaffiunngitsumik aallartussat.
  • Misissortissimanissamik piumasaqaat meeqqanut marluk inorlugit ukiulinnut atuutinngilaq.

Angallassissummik piginnittup qulakkiissavaa angalasut tamarmik malittarisassat malinneqarnissaat.

Qanermut imaluunniit kiinnamut assiaquteqarnissamut piumasaqaat: 12-nik ukioqalereersunut tamanut atuuppoq

Inuit 12-nik ukioqalereersut inini kikkunnit tamanit iserfigineqarsinnaasuni isersimagunik, pisiniarfinni kiffartuussinermillu ingerlatsivinni sulisut pisisartunik attaveqarnerminni, imaluunniit assartuutini kikkunnit tamanit ilaaffigineqarsinnaasuniippata qanermut imaluunniit kiinnamut assiaquteqassapput. Qanermut imaluunniit kiinnamut assiaquteqarnissamut piumasaqaat ilisimassutsimik annikillisimasunut, timikkut tarnikkulluunniit sanngiitsunut, allamilluunniit peqquteqarlutik qanermut kiinnamulluunniit assiaquteqarsinnaanngitsunut atuutinngilaq.

Pisiniarfinni kiffartuussivinnilu sulisut qanermut kiinnamulluunniit assiaqutit atunngikkaluarlugit pisiniat sulisullu akornanni plastikimik assiaqutit atorsinnaavaat.

Malugiuk:

  • Inuk Covid-19-imut tamakkiisumik akiuussuserneqarsimasutut isigineqassaaq inuup akiuussuserneqarsimanerup ingerlarngata naammassisimanera uppernarsarsinnaappagu. Nunatta Nakorsaaneqarfiata akiuussuserneqarsimanermut uppernarsaatit sorliit akuerisaanersut aalajangissavai.
  • Unioqqutitsinerit pinerluttulerinermik inatsit malillugu pineqaatissinneqarsinnaavoq
  • Maleruagassat politikkikkut allatulluunniit isummersornissamik sunniiniarnissamik siunertalinnut atuutinngillat.
  • Maleruagassat eqqartuussiveqarfinnut atuutinngillat.
  • Maleruagassat meeqqeriveqarfinnut, atuarfinnut ilinniarfeqarfinnullu
  • Maleruagassat angerlarsimaffinnut atuutinngillat.
  • Nunatta Nakorsaaneqarfia maleruagassanut immikkut ittumik akuersissuteqarsinnaavoq.

Nalunaarut tamaat uani atuarsinnaavat.

Paasissutissat allat naalakkersuisup allattaa Mads Pedersen, email mpbr@nanoq.gl aqqutigalugu pissarsiarisinnaapput.