Nuummi Sisimiunilu ininut tamanut iserfigineqarsinnaasunut isernissamut akiuusutissinneqarsimanissaq piumasarineqarpoq

Assersuutigalugu Nuummi Sisimiuniluunniit neriniartarfimmut, filmertarfimmut, timigissartarfimmut katersugaasivimmulluunniit isernissamut tamakkiisumik kapitissimanissaq, imaluunniit Coronamik tunillatsissimannginnermut uppernarsaammik, sivisunerpaamik nal. ak. 48-nik pisoqaassusilimmik takutitsisinnaanissat piumasarineqarpoq.

Naalakkersuisut aalajangerput, illoqarfinni marluusuni tuniluuttoqangaatsiarneranut killilersuiniarlutik akiuussutissinneqarsimanissamut uppernarsaateqarnissamik piumasaqaat Sisimiunut atuutsilerniarlugu.

Maleruagassat nutaat ataasinngornermi 1. novembarimiit marlunngornermut 30. novembari ilanngullugu atuutissapput.

Taamaallaat tamakkiisumik kapitissimaguit, imaluunniit Coronamik tunillatsissimannginnermut uppernarsaammik, sivisunerpaamik nal. ak. 48-nik pisoqaassusilimmik takutitsisinnaaguit sumiiffinnut ukununnga isersinnaavutit:

  • Neriniartarfiit, kaffisorniartarfiit, imerniartarfiit, diskotekit assigisaallu, kiisalu silami nunaminertat taakkununnga atasut.
  • Kulturikkut sullissiviit: Kulturip illorsui, filmertarfiit, katersugaasiviit, inersuit saqqummersitsisarfiit assigisaallu.
  • Innuttaasut illui assigisaallu.
  • Atuakkanik atorniartarfiit.
  • Illup iluani silamilu timersortarfiit, soorlu init timersortarfiit, inersuit timersortarfiit, naluttarfiit, timigissartarfiit isikkamillu arsartarfiit.
  • Nujalerisut, tagiartuisartut, pinnersaasartut assigisaallu.

Akiuussutissinneqarsimanngikkuit suli sumiiffinnut ukununnga, Coronamik tunillatsissimannginnermut uppernarsaammik, sivisunerpaamik nal. ak. 48-nik pisoqaassusilimmik takutitsinngikkaluarlutit isersinnaavutit:

  • Pisiniarfiit
  • Allakkeriviit
  • Mittarfiit
  • Pisortani oqartussaasunut suliffeqarfinnullu pilersuisuusunut saaffiginnittarfiit.
  • Assartuutinut tamanit atorneqartunut utaqqisarfiit.
  • Init suliannik ingerlataqarfigisatit.

Innuttaasut akiuussutissinneqarsimanngitsut Sisimiuniit Nuummiillu Kalaallit Nunaanni illoqarfinnut allanut angalasut suli maleruagassanik malinnittussaapput. Aatsaat ullut tallimassaanni imaluunniit ulluni 14-ini angerlarsimareernermi sumiiffinnut tamanit orninneqartartunut isersinnaapput katersuunnernulluunniit peqataasinnaalissallutik.

Maleruagassat atuarfinnut, ulluunerani paaqqinnittarfinnut, suliffeqarfinnut imaluunniit assartuutinut tamanit atorneqartunut atuutinngillat.

Piffissap ilaani Covid-19-imut misissortinnissamut periarfissat killeqarsinnaapput, misissuisarfinni tunillatsissimasunik ujartuinermi inuit misissorneqartussat aamma inuit ersiutillit salliutinneqartussaammata.

Eqqaamassavat

Nalunaarummi matumani kingullermeerlutit kapitissimaguit akiuussusersuinermik naammassinnissimasutut isigineqassaatit.

Tamakkiisumik akiuussutissinneqarsimanermut uppernarsaat tassaasinnaavoq Coronapas, pappiaqqat kapitinnermut atatillugu tunniunneqartut imaluunniit peqqinnissaqarfimmiit kapitissimanermut uppernarsaat.

Coronamik tunillatsissimanermut uppernarsaat, ullut 14-it aamma sapaatit akunnerisa 12-it akornanni pisoqaassusilik aamma uppernarsaatitut akuerineqarpoq.

Akiuussutissinneqarsimanermut piumasaqaat meeqqanut 0-11-nik ukiulinnut atuutinngilaq.

Akiuussutissinneqarsimanermut piumasaqaat inunnut, Nakorsaaneqarfimmiit kapitittariaqanngitsutut naliliiffigineqartunut atuutinngilaq.